“Yuxarılar”ın da agah olmasının vaxtı çatan məsələlər

10 Dekabr 2019 23:15 Azərbaycan Futbolu 755
“Yuxarılar”ın da agah olmasının vaxtı çatan məsələlər

AFFA İcraiyyə Komitəsinin (İK) 2019-cu il üçün yekun iclasının tarixi bəllidi. Hələ ötən həftədən tədbirin dekabrın 13-də keçiriləcəyi dəqiqləşib. Assosiasiya AFFA-nın inzibati binasında keçiriləcək iclasın gündəliyinə 13 məsələnin salındığını elan edib.

Qəribə olan AFFA-nın ilk dəfə bu qədər çox məsələnin gündəliyə salındığını elan etməsidi. İndiyədək daha az sayda məsələ müzakirə edilər, indi hansısa bənddə xüsusi göstərilən önəmsiz məsələlər “Digər məsələlər” adı ilə gizlədilərdi. Lakin bu dəfə “Digər məsələlər” yoxdu, saat 10:00-da başlayacaq yığıncaqla bağlı sirr saxlanmayıb.

Nəhs gündə nəhs sayda məsələnin müzakirəyə çıxarılmasında qəribəlik axtarmayaq, bütün rəqəmlər eynidi. Eyni olmayan Elxan Məmmədovun niyyətidi. Baş katib gündəliyi “şişirtməklə” İK-ya qarşı məqsədini, məkrini göstərir. Bütün tənqidlərin hədəfi olmaqdan qurtulmaq üçün guya ki, bütün anormal qərarların məhz bu qurumda verildiyini, hər zaman hər şeyin bu şəkildə müzakirə edildiyini göstərmək istəyir. Halbuki elə İK-nın xüsusi qərarı ilə prezident səviyyəsində səlahiyyətlər alan Elxan bəyin bütün futbol təsərrüfatını təkbaşına idarə etdiyi kimsəyə sirr deyil.

Bütün bunlar hamımızın bildiyi, “yuxarılar”ın da agah olmasının vaxtı çatan məsələlərdi. Bəlkə İK üzvləri də ayılıb onların adından istifadə edildiyinin fərqinə vardı. Əmr qulu olduqlarını qəbul edirlərsə, özlərini Məmmədovun hər ssenarisini rəsmiləşdirmək üçün əl qaldırmağa məcbur sayırlarsa, öz işləridi. Amma biz komitənin iclasına kimi gündəliyə daxil edilən məsələlərə fərqli yanaşacaq, iclas zamanı üzvlərin baş katibin hər yönəltməsinə münasibət göstərərkən bir daha düşünməsinə çalışacağıq. Eyni zamanda “yaddan çıxan”, amma müzakirəsi vacib olan daha önəmli məsələlərin siyahısını da təqdim edəcəyik.

1. Gəncə şəhər stadionunun ərazisində yeni, standart ölçülü (105x68 m.) süni örtüklü məşq meydanının inşasının başa çatması ilə bağlı məlumat

Çox gözəl, çox pakizə. İK üzvləri bu hesabatdan məmnun olacaq. Ümid edirik, maliyyə hesabatına da xüsusi diqqət edəcəklər. Eyni zamanda, katiblikdən Gəncədə baş verən 2 il öncəki olayla bağlı da söz salacaqlar. “Kəpəz”dəki maliyyə yeyintisi, Mikayıl Nərimanoğlunun bu səbəbdən futboldan qovulmasıyla bağlı araşdırmanın nəticələrini yada salmaq pis olmaz. Çünki indiyədək həmin qalmaqalın hesabatı verilməyib. Kluba maliyyəni AFFA-nın ayırdığını nəzərə alsaq, İK üzvlərinin bu barədə dəqiq bilgiyə sahib olması vacibdi.

İndi gündəlikdə məsələ sayını artırmaq, eyni zamanda guya ki, bölgələrdə futbola diqqət göstərilməsi, infrastrukturun yaxşılaşdırılması üçün addımlar atıldığını göstərmək üçün bu məsələ ilk bəndə salınıb. O zaman sualımız var: son illərin bütün tikintiləri haqda niyə belə məlumatlar verilməyib? Yevlax, İmişli, Zaqatala, Lənkəran, Şüvəlan, Bayıl, Biləcəri stadionları niyə yaddan çıxıb? Bəli, onların əksəriyyəti AFFA-nın balansında deyil, amma axı, Gəncə stadionunun da assosiasiyaya dəxli yoxdu.

Heydər Əliyevin adını daşıyan İmişli stadionunun indiki durumu niyə gündəliyə salınmır? Və ya “Bakı”nın viran olmuş bazası futbol təsərrüfatının bir parçası deyildimi? (futbolinfo)

Xəbər Lenti