Rauf Əliyev yeni klubu "Səbail"in heyətində qol hesabını açıb.
31 yaşlı hücumçu Premyer Liqanın XVII turunda "Qəbələ"ni 3:1 hesabı ilə yendikləri oyunun 70-ci dəqiqəsində fərqlənib. Bununla da, mövsüm ərzində ikinci klubda ilk qolunu vurub.
Millinin sabiq üzvü cari mövsümün ilk yarısında “Neftçi”də də fərqlənmişdi. Forvard əvvəlki mövsümlərdə daha 5 komandada - “Qarabağ”, “Bakı”, “Xəzər Lənkəran”, “Keşlə” və “Qəbələ”də rəqib qapısına yol tapıb.
“Qəbələ”yə vurduğu topla Əliyev heyətində fərqləndiyi klubların sayını 7-yə çatdırıb. O, Azərbaycan çempionatlarının 28 illik tarixində 7 və daha çox klubda qol vuran 12-ci oyunçudur. Mütləq rekord 10 komandada bunu bacaran Kənan Kərimova məxsusdur.
Sportinfo.az-ın məlumatına görə, Raufun qolu “Səbail“ə 6000 manata başa gəlib. “Neftçi“də ayına 12 min manat maaş alan hücumçu “dənizçilər“lə bundan iki dəfə aşağı məbləğə anlaşıb.
