"Bunu rəhbərlikdən soruşsaz, daha yaxşı olar" - Coşqun Diniyev

23 Noyabr 2019 22:00 Sabah 571
"Bunu rəhbərlikdən soruşsaz, daha yaxşı olar" - Coşqun Diniyev

"Sabah"ın yarımmüdafiəçisi Coşqun Diniyev Premyer Liqanın 12-ci turunda səfərdə "Səbail"ə 3:1 hesabı ilə qalib gəldikləri oyundan sonra Sportinfo.az-ın əməkdaşının suallarını cavablandırıb.

- Hesabda geri düşsəz də, 9 dəqiqəyə 3 qol vurub, qələbə qazandınız...

- Oyun bizim üçün çətin keçdi. Bilirdik ki, "Səbail" neçə turdur qələbə qazana bilmir və meydana 3 xal üçün çıxacaq. Hava da soyuq idi. Bu gün futbol oynamaq üçün şərtlər ağır idi. Öz səhvimizdən hesabda geri düşdük. Şükürlər olsun ki, toparlandıq və 3 top vurduq. İstərdik ki, bu qolları oyunun əvvəlində, daha tez vuraq. Alınmadı. Ancaq sevindirici haldır ki, komanda təslim olmadı. Özündə güc tapıb, əzmkar qələbə qazandı.

- Ehtiyatda qalmağın nə ilə bağlı idi?

- 2 turdur oynamırdım. Bu gün də meydana çıxmağım sual altında idi. Komanda hesabda geri düşməsəydi, bəlkə də heç oynamayacaqdım. Topuq nahiyyəmdə yırtıqlar var. Bu gün də iynə ilə oynadım.

- Demək olar ki, sənlə Diallonun meydana daxil olmağı oyunun nəticəsinə 100 faiz təsir etdi?

- Deməzdim ki, qollarda xüsusi əməyim oldu. Ancaq Diallo 2 qol vurdu. İş elə gətirdi ki, bunlar biz meydana girəndən sonra oldu. Əsas olan komandanın geridönüş etməsi idi.

- Yəni deyirsən ki, qələbənizdə bəxt amilinin də rolu oldu?

- Belə demək də olar, deməmək də. Siz kənardan baxırsız, mən isə meydanın içindəyəm. Oyuna diqtə edən tərəf biz idik. Buna görə bəxt demək olmaz. Daim hücum edən komanda əvvəl-axır istədiyi nəticəni qazana bilir. Bəxtlə ona görə əlaqələndirmək olar ki, sona 7-8 dəqiqə qalmış 3 qol vurduq. Futbolda hər şey mümkündür.

- Zədəli olduğun məqamları çıxsaq, çox vaxt əsas heyətdə olursan. Qardaşın Kərim isə daha çox ehtiyatda qalır.

- Qardaşımın mövqeyində həqiqətən yaxşı futbolçular var. Mənim oynamağıma gəlincə, öz üzərimdə çox çalışıram. Bura "Qarabağ"dan gəlmişəm. Oradan ayrılmağımın səbəbi daim oynamaq istəyim idi. "Sabah"da istədiyim qədər oynamağa şans yaradırlar. Əlbəttə, istərdim ki, qardaşımla birlikdə əsas heyətdə oynayım. Onun mövqeyində oynamaq daha çətindir. Çünki rəqibləri çoxdur.

- Səncə, "Sabah" bu qələbədən sonra uğursuzluq zolağından çıxa biləcək?

- Ümid edirəm ki, "qara zolaq"dan çıxacağıq. Bir oyun çox yaxşı oynayırıq, növbəti matçda davamı gəlmir, uduzuruq. Yuxarı pillələrdə qərarlaşmaq istəyən komanda buna diqqət yetirməlidir. Nəticə baxımından bu, çox vacibdir. Amma oyun sarıdan çempionatın ən yaxşı 3 komandasından biriyik.

- Qeyri-sabitliyi nə ilə əlaqələndirərdin?

- Bilirsiz ki, ilk 11-likdə oynayan futbolçular birinci ildir komandadadırlar. Hamı bir-birini tam anlaya bilmir. Oturuşmamış komandayıq. Qışa qədər yaxşı yer tutsaq, fasilədə uyğunlaşma üçün vaxt çox olacaq. İnanıram ki, qışdan sonra qeyri-sabitlik aradan qalxacaq.

- Rəhbərlik qarşınıza hansı hədəfləri qoyub?

- Bunu rəhbərlikdən soruşsaz, daha yaxşı olar. Amma bizdən hər oyunda qələbə istəyirlər. Onların da fikri, istəyi odur ki, komanda Avroliqada iştirak etsin. Biz də bunu reallaşdırmağa çalışacağıq.

ELVİN Əhəd

Xəbər Lenti
18 Yanvar 23:43 Bordin "Neftçi"dən getdi?
18 Yanvar 20:15 "Səbail" yenə uduzdu
18 Yanvar 18:00 Ayın ən yaxşısı
18 Yanvar 17:01 Xavi ilk tutulunu qazandı