Azərbaycan futbolunun əsas hərəkətverici qüvvəsi olan “Qarabağ” təkcə əsas komandasıyla deyil, akademiyasında yetişən intizamlı və qalib ruhlu gəncləri ilə ölkə futbolunun gələcəyini formalaşdırır.

Bu akademiyanın yetişdirdiyi və son dövrlərdə nümayiş etdirdiyi stabilliklə diqqət çəkən ən parlaq simalarından biri də Əziz Cabbarlıdır.

Cari mövsümdə “Qarabağ”ın U-19 komandasının heyətində qazanılan növbəti çempionluq Əzizin karyerasında təsadüfi bir uğur deyil, gərgin əməyin və böyük potensialın məntiqi nəticəsidir.

Gənclər Liqası gənc futbolçuların peşəkar futbola, yəni əvəzedici və əsas komandalara keçidi ərəfəsində ən çətin və həlledici mərhələ hesab olunur.

Bu səviyyədə çempionluq qazanmaq təkcə fiziki hazırlıq yox, həm də yüksək psixoloji dözümlülük tələb edir.

Əziz Cabbarlı bu mövsüm “Qarabağ”ın heyətində nümayiş etdirdiyi oyunla komandanın “onurğa sütunu”na çevrilməyi bacardı.

Meydandakı taktiki savadı, oyun nizam-intizamına sadiqliyi və kritik anlarda məsuliyyəti üzərinə götürmə qabiliyyəti onu həm məşqçilər heyətinin, həm də komanda yoldaşlarının ən güvəndiyi adlardan birinə çevirdi.

Qazanılan bu çempionluq Əzizin “Qarabağ” fəlsəfəsini nə qədər dərindən mənimsədiyinin sübutudur.

Milli səviyyədə etimad: U-20-yə qədər uzanan yol...

Əziz Cabbarlını həmyaşıdlarından fərqləndirən və onun potensialının miqyasını göstərən ən mühüm amillərdən biri də milli komandalardakı statusudur.

Öz yaş qrupunda göstərdiyi üstün performans seleksiyaçıların diqqətindən yayına bilməzdi. Təsadüfi deyil ki, adıçəkilən gənc artıq U-20 milli komandasının üzvüdür.

Özündən yaşca böyük və daha təcrübəli oyunçuların yer aldığı U-20-də komandanın bir hissəsi olmaq Əzizin futbol zəkası və fiziki keyfiyyətlərinin öz həmyaşıdlarının səviyyəsini aşdığını göstərir.

Beynəlxalq oyunlar və millinin düşərgələrində topladığı təcrübə onun klub karyerasındakı inkişafını daha da sürətləndirir.

Müasir futbolda gənc istedadın sadəcə istedadlı olması bəs etmir; o, həm də qalib gəlməyi, təzyiq altında oynamağı və titullar qazanmağı öyrənməlidir.

Əziz Cabbarlı məhz bu keyfiyyətləri özündə birləşdirən, “Qarabağ”ın əsas komandasına namizəd profilli bir oyunçudur.

U-19 səviyyəsində qazanılan bu qızıl medal onun böyük futbola keçid sınağından uğurla keçdiyinin vizit kartıdır.

Karyera pillələrini addım-addım, lakin qətiyyətlə dırmaşan Əziz həm Ağdam təmsilçisinin, həm də Azərbaycanın əsas millisinin gələcəyi üçün çox böyük vədlər verir.

İndi qarşıda duran əsas hədəf bu çempionluq impulsunu qoruyaraq, U-20 millisindəki statusunu möhkəmləndirmək və yaxın gələcəkdə ölkənin bir nömrəli klubunun əsas heyətində yer almaq üçün növbəti böyük sıçrayışı etməkdir.

SPORTİNFO.AZ