Mövsümü titulsuz başa vuracağı dəqiqləşən “Qarabağ” “Turan Tovuz”la ağır oyundan sonra bölgəyə səfər edəcək.
“Köhlən atlar” spesifik hava şəraitinə görə fərqlənən Qəbələdə meydana çıxacaq.
“Qırmızı-qaralar”la “köhlən atlar” fərqli hədəflər uğrunda mübarizə aparmasına baxmayaraq, qəbələlilər doğma meydandakı görüşlərdə xoş təsir bağışlayır.
“Qəbələ” elitada qalmaq hədəfinin öhdəsindən gəlməyə çalışırsa, “Qarabağ”ın çempionatı 2-ci pillədə başa vuracağı böyük ölçüdə dəqiqələşib.
Qonaqların matça necə motivasiya olacağı sual doğurmaya biməz.
Ağdam təmsilçisinin müdafiə xəttindəki dirəyi Kevin Medina Sportinfo.az-a açıqlamasında oyunla bağlı təxminlərini dilə gətirib:
“Oyuna motivasiya olmaq üçün xüsusi nəyəsə ehtiyac yoxdur. “Qarabağ”ın adı ən böyük motivasiyadır.
İndidən növbəti mövsümün hazırlıqlarına başlamaq lazımdır. Uğurlu başlanğıc üçün ardıcıl qələbələr və yüksək əhval-ruhiyyə mütləqdir.
“Qarabağ” qələbə qazanmağa alışmış komandadır. Bu, Qəbələ səfərində də istisna olmayacaq.
Bu gün əldə etdiyimiz nəticələr növbəti mövsümün başlanğıcıdır. Ona görə də diqqətli və məhsuldar olmalıyıq”.
Mayın 9-da Qəbələ şəhər stadionunda keçiriləcək oyun saat 17:00-da başlayacaq.
HƏBİB
