“Qarabağ”ın müdafiəçisi Elvin Cəfərquliyevin əvəzedici heyətə göndərilməsi gündəm olub.
Teleqraf komandanın baş məşqçisi Qurban Qurbanovu belə addım atmağa vadar edən səbəbi öyrənib.
Saytın məlumatına görə, son dövrlərdə daha da populyarlaşan millimizin üzvü futboldan kənara işlərə daha çox vaxt ayırıb.
Bunların arasında xüsusi əyləncəli partilər də yer alıb. Xanımların da iştirak etdiyi partilərin sayının artması Elvin Cəfərquliyevin “qələminin qırılması” ilə nəticələnib.
Qurban Qurbanov vacib oyunlardan biri öncəsi Elvin Cəfərquliyevin partidə iştirakını öyrəndikdən sonra daha əvvəllər də intizamsızlığa yol verən futbolçusunu bağışlamayıb. Nəticədə 25 yaşlı sol cinah oyunçusu əvəzedici komandaya göndərilib.
Sportinfo.az-ın bu mövzuda əldə etdiyi informasiyaya görə, məlum hadisə “Şamaxı“ ilə səfər matçından sonraya təsadüf edib.
0:0 başa çatan Premyer Liqanın 27-ci tur matçının ardından o, komanda yoldaşı Abbas Hüseynovla birlikdə Bakıdakı gecə klublarından birinə üz tutub və səhəri orada açıb.
Qurbanov onların görüntülərini əldə edib.
Hadisədən haqlı olaraq hiddətlənən mütəxəssis səbəbəkarlara bu halın dözülməz olduğunu çatdırıb. Amma özü futbolçularla görüşməyib, fikrini idarəçilər vasitəsilə bildirib.
