“Araz Naxçıvan” AFFA və Peşəkar Futbol Liqası qarşısında götürdüyü öhdəlikləri yerinə yetirə bilmir.
Mayda federasiyanın Lisenziyalaşdırma Qrupu tərəfindən Premyer Liqada iştiraka dair müvafiq lisenziya alan, iyunun 15-də İcraiyyə Komitəsinin qərarı ilə yarışmaçılar sırasına dönüşü rəsmiləşən Muxtar Respublika təmsilçisi ev oyunlarını keçirdiyi stadionda yenidənqurma işlərinə start verməyib.
Hərçənd bölgə klubu iyunun 17-dən bu prosesi başladacağına söz vermişdi. Aradan neçə gün keçib, nə işıqlandırma sisteminin, nə də meydançanın dəyişdirilməsi istiqamətində addım atılıb.
“Araz Naxçıvan”ın sahibi Vüqar Abbasov klubu yaşatmağa əvvəlkitək maraq göstərmədiyindən, vəziyyət kritik olaraq qalmaqdadır.
Əlbəttə, müvafiq qurumlar mövcud durumdan məmnun deyil və öz narazılıqlarını qarşı tərəfin nəzərinə çatdırıblar.
SPORTİNFO.AZ
