«Komandamız 2 aylıq fasilədən sonra məşqlərə start verib.

Artıq 1 aydır ki, növbəti sezona hazırlıqlarımız davam edir».

Bu sözləri Sportinfo.az-a açıqlamasında «Baku Fire»nin baş məşqçisi Teymur Eyvazov deyib.

Sentyabrın 13-də futzal üzrə Yüksək Liqada 2022/2023 mövsümünün püşkü atılacaq.

Çempionatda iştirak üçün 6 komanda - “Araz-Naxçıvan”, “Neftçi” İK, “Baku Fire”, “Rekord club az”, “Alyans” FK (Lənkəran) və U-19 qeydiyyatdan keçib.

Yarışa sentyabrın 26-da start veriləcək.

Ötən mövsüm Yüksək Liqada 4-cü pilləni tutan “Baku Fire” qarşıdakı “futzal ili“ndə daha iddialı olacaq. Hər halda gənc mütəxəssis bunun üçün çalışacaqlarını bildirib:

“İlk 6 məşqimiz seleksiya xarakteri daşıdı. Həmin çalışma periodunda keçən sezonda komandamızın formasını geyinmiş bütün oyunçuları və yeni baxışa gələnləri sınadıq.

Komandamız tam formalaşmasa da, müəyyən oyunçularla anlaşdıq.

Bildiyiniz kimi, «Baku Fire-2» əsasən cavan futzalçılardan ibarətdir. Ötən mövsüm Birinci Liqada iştirak edən komandamızdan 5 oyunçunu artıq Yüksək Liqada oynatmağı düşünürəm,

Bundan əlavə, heyətə 2 legioner qatmağı planlaşdırırıq. Çempionata qədər 3-4 yoxlama oyunu keçirməyi nəzərdə tutmuşuq.

Rəqiblərimiz arasında təlim-məşq toplanışı keçmək üçün Bakıya gəlmək istəyən Türkmənistan yıgması da var.

Yüksək Liqada mübarizə sentyabrın sonu start götürəcək və ona kimi komandamı formalaşdırmağa çalışacam. Hədəfimiz isə sonuncu sezondakı nəaliyyətimizi yaxşılaşdırmaqdır».