I Liqada dördüncü turun görüşləri start götürüb.

Çempionatda debüt mövsümünü keçirən «Difai» Ağsuda «Qaradağ Lökbatan»la qarşılaşıb.

Çimərlik futbolu üzrə FİFA referisi İnqilab Məmmədov bu matça da öz bədnam «damğa»sını vurub.

Təyinat aldığı əksər Premyer Liqa oyunlarında özünü yaxşı tərəfdən göstərə bilməyən baş hakim aşağı dəstənin qarşılaşmasında da ciddi səhvlə yadda qalıb.

Ağsuda qapılara cəmi 1 qol vurulub ki, onu da Məmmədovun ayağına, daha doğrusu, fitinə yazmaq lazımdır. «Qara» ləqəbli «fit sahibi» 29-cu dəqiqədə Qarbağ qazilərinin təmsilçisi olan «Difai»nin əleyhinə yanlış qərar verib.

O, qapıçıyla üzbəüz çıxan Seyxan Fərəcovun özünü yerə atmasını penalti olaraq «qiymətləndirib» və Coşqun Əsədzadəyə sarı vərəqə göstərib.

Protokola baxıb görürük ki, eynəyini unudub evdə qoyan Məmmədov «Difai»nin müdafiəçisinin bu epizodda qeyri-idmani hərəkətə yol verməsini yazıb.

Halbuki kadrlardan açıq-aşkar görünür ki, Coşqun rəqibin hücumçusuna toxunmayıb - nə əllə, nə ayaqla.

Ev sahiblərinin qapıçısı Aleksandr Prikrotsov topa daha tez toxunub və onun istiqamətini dəyişib, Orxan isə sanki zərbə alıbmış kimi meydana sərilib.

İnqilabın simulyanta sarı vərəqə göstərmək əvəzinə penalti nöqtəsini nişan verməsi təəssüf və təəccüb doğurur… Eləcə də «Difai»nin onun xətası nəticəsində növbəti məğlubiyyəti alması.

SPORTİNFO.AZ