Avropa Qızıl Liqasına hazırlaşan qadın voleybolçulardan ibarət Azərbaycan millisinin Sloveniyada təşkil olunan təlim-məşq toplanışını başa vurub.
Sportinfo.az xəbər verir ki, Maribor şəhərində baş tutan hazırlıq prosesində komandamız Sloveniya yığması ilə birgə məşqlər edib.
Həmçinin, millimiz buradakı təlim-məşq toplanışı çərçivəsində ABŞ-ın “Spartans” klubu ilə yoxlama oyunu keçirib və qarşılaşma millimizin 4:0 hesablı qələbəsi ilə başa çatıb.
Hazırlıq prosesinin növbəti mərhələsi çərçivəsində komandamız bu gün Sloveniyadan Yunanıstana yola düşüb.
Millimiz mayın 24-dək burada təlim-məşq toplanışında olacaq. Komandamızın Yunanıstanda da yoxlama oyunları keçirməsi nəzərdə tutulur.
Yığmamız Avropa Qızıl Liqasında ilk oyunlarını Bakıda keçirəcək. Mayın 30-da və iyunun 1-də baş tutacaq bu görüşlərdə rəqiblərimiz Macarıstan və Sloveniya komandaları olacaq.
