“Şamaxı”nın keçmiş məşqçi və futbolçu heyəti klub rəhbərliyindən zəng gözləyir.
Səbəb ötən mövsümdən qalan borcların hələ də verilməməsidir.
2022-2023 futbolun ilində komandanın məşqçilər heyətində yer alan şəxslərin heç biri, həmçinin, Elvin Məmmədov, Amil Yunanov, Rəhman Daşdəmirov kimi futbolçular ötən mövsümdən qalan maaşlarını ala bilmirlər.
Məşqçilər 2 (may və iyun), futbolçuların isə 1 ayın (may) əməkhaqqısını gözləyir. Di gəl, konkret cavab yoxdur.
Gecikmə müəmmasına aydınlıq gətirmək üçün klubun mətbuat katibi Yusif Hüseynlə əlaqə saxlayanda məlum oldu ki, artıq borcların bağlanması prosesinə start verilib:
“Qeyd etdiyiniz məsələ klub rəhbərliyinin diqqətindədir. Avqustun sonundan başlayaraq qalıq maaş və mükafatlar verilməyə başlayıb. İlkin mərhələdə məvacibi az olan 7 futbolçunun əməkhaqqısı ödənilib.
Hazırda yerdə qalan 8 futbolçu və 4 məşqçinin maaşının verilməsi üzrə iş gedir. Yaxın 15 gün, maksimum bir ay ərzində bütün maaş və mükafat borcları bağlanacaq”.
HƏBİB / SPORTİNFO.AZ
_1.jpg)
