“Sabah”ın ispaniyalı legioneri Sofian Çakla Sportinfo.az-a müsahibə verib.

30 yaşlı müdafiəçi komandasının “Makkabi”yə 3:6 hesablı yenilgisinin səbəblərindən söz açıb, mərhələni adlamağın sevincini bölüşüb.

-Yorğunluq, həyəcan, sevinc – hamısı bir-birinə qarışıb deyəsən.

- Daha çox yorğunluğu qeyd edərdim. Əlhəmdülillah, çəkdiyimiz zəhmətin, tökdüyümüz tərin qarşılığını gördük. Həqiqətən çox çətin oyun oldu İstər psixoloji, istərsə də fiziki baxımdan. Bir gün istirahət edib “Şamaxı” ilə qarşılaşmaya hazırlaşacağıq.

- Səfərdə qapısında top görməyən “Sabah”a bu gün nə olmuşdu? 6 top buraxmağınızı nə ilə əlaqələndirə bilərsən?

- Əsasən onların cinah ötürmələri zamanı səhvlərə yol verdik. Bu da rəqibin sürət təklif etməsi və ev tapşırıqları üzərində çalışmasının nəticəsi idi. Fikir verirdinizsə, hər dəfə top onlarda olanda cinahlara meyillənirdilər. Səhvlərimizə təkrar-təkrar baxıb, nəticə çıxaracağıq.

- Penalti seriyasında ilk zərbəni vurmaq heç də asan olmur. Topa yaxınlaşanda özünü necə köklədin?

- Təcrübəli futbolçuyam və bilirdim ki, mənim dəqiq vuruşumdan çox şey asılıdır. Bu cür məqamlarda yalnız pozitiv düşünməlisən, neqativdən uzaq olmalısan. Açığı, topa ilk yaxınlaşmaq öz istəyim idi. Fikrimi topa və rəqib qapıçıya yönəltməklə istəyimə çatdım. Başqa xüsusi nəsə etmədim.

- Uğuru kimə həsr edirsən?

- “Sabah” camiəsinə - azarkeşlərimizə, klub rəhbərliyinə, inzibatçılara, xadimələrə, uğurumuzu istəyən hər kəsə. Biz meydanda görünən tərəfik, ancaq arxa fonda görünməyən insanlar var. Onlar da bu qələbədə böyük pay sahibləridir.

HƏBİB