.jpg)
"Sabah" Azərbaycan Kuboku 1/4 final mərhələsinin ilk oyunu çərçivəsində öz meydanında "Qarabağ"a 1:7 hesabı ilə məğlub olub.
Sportinfo.az xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırıb:
- Rəqib bütün komponentlərdə bizdən üstün idi. Bu məğlubiyyətə görə heç bir bəhanə axtarmaq lazım deyil. Günahkar özümüzük.
- Görünürdü ki, "Sabah"ın açıq futbol oynaması "Qarabağ"ın işinə yaradı. Başqa cür oynamaq olmazdı?
- İlk hissədə özümüz rəqibə 3 qol hədiyyə verdik. Ondan sonra artıq hesabın 1:5, 1:6, 1:7 olmasının fərqi yox idi.
- İkinci qola qədər Nicatda zədə olduğu görünürdü. Amma həkimləri çağırmadı. Bunu necə şərh edərdiniz?
- Niyə etmədiyini anlamıram. Əslində təcrübəli futbolçudur. Yerə yıxılıb həkimləri çağırmalı idi. Zədən varsa, niyə oynayırsan? Çıxmaq lazımdır.
- Sıx qrafikdəsiz. Ağır məğlubiyyət komandaya psixoloji cəhətdən necə təsir edəcək?
- 1:7 ağır nəticədir. Təsir edib-etməyəcəyini bilmirəm. Amma bütün bunların öhdəsindən gəlməliyik.
- "Sabah" tarixinin ən ağır məğlubiyyətidir. Bu nəticədə sizin və rəhbərliyin günahı nə qədərdir?
- Yüz faiz mən günahkaram. Məşqçi mənəm, keyfiyyətə görə mən məsuliyyət daşıyıram.
