Azərbaycan futbolunun perspektivli gənc oyunçularından biri olan Nazim Hüseynov "İmişli" ilə 2.5 illik rəsmi müqavilə imzalayıb.
Bu transfer həm yarımmüdafiəçinin karyerası, həm də ölkə futbolu baxımından əlamətdar hadisə kimi qiymətləndirilir.
Sportinfo.az xəbər verir ki, Nazimin əsas məqsədi müntəzəm oyun təcrübəsi qazanmaq, komandaya real töhfə verməklə yanaşı, öz fərdi keyfiyyətlərini mərhələli şəkildə inkişaf etdirməkdir. "
İmişli" gənc futbolçu üçün rəqabətli mühitdə formalaşmaq, yüksək səviyyəli oyun ritminə uyğunlaşmaq və peşəkar futbolun tələblərinə cavab vermək baxımından vacib platforma hesab olunur.
Xüsusilə qeyd etmək lazımdır ki, 18 yaşında bir futbolçunun Premyer Liqa klubuna transfer olunması nadir və ciddi göstəricidir.
Bu addım Nazim Hüseynovun potensialına olan inamın, eləcə də düzgün planlaşdırılmış inkişaf yolunun nəticəsi kimi dəyərləndirilir.
Nazim Hüseynovun bundan sonrakı mərhələdə əsas hədəfi stabil çıxışlar nümayiş etdirmək, oyun keyfiyyətini artırmaq və uzunmüddətli perspektivdə həm klub, həm də milli futbol üçün dəyər yaradan oyunçuya çevrilməkdir.
Gənc futbolçu ölkə futbolunun aparıcı akademiyalarında formalaşıb. Nazim son olaraq “Qəbələ”nin formasını geyinib.
"İmişli" bunadək Dioqo Kardozunu transfer edib.
