Tanınmış şərhçi "İdman"dan “CBC Sport”a keçdi: "Bu 10 ilin də son günü gəlib çatdı"

2 İyul 22:20 Maraqlı 456
Tanınmış şərhçi "İdman"dan “CBC Sport”a keçdi:

"İdman TV"nin tanınmış şərhçisi Ramiz Mirzəzadə sözügedən telekanaldan ayrılıb.

Sportinfo.az xəbər verir ki, artıq onun yeni iş yeri də bəlli olub.

Belə ki, R.Mirzəzadə fəaliyyətini "CBC Sport"da davam etdirəcək. O, 10 il idi ki, "İdman TV" kanalında çalışırdı. Mirzəzadə bununla bağlı sosial şəbəkə hesabında bunları qeyd edib:

"Əvvəla 2 iyul beynəlxalq idman jurnalistləri günü münasibətilə hər bir həmkarımı ürəkdən təbrik edirəm. Onlara bu günlərdə ən vacib məsələ olan möhkəm can sağlığını arzu edirəm. İkinci növbədə isə işlərində uğurlar arzu edirəm. Bu günlər İdman TV-də iş fəaliyyətimin nə az nə çox düz 10 ili tamam oldu.

Bu müddətdə çoxlu dost, qardaş, gözəl insanlar qazandım. İşimlə əlaqəli insanların xoş münasibəti məni işimə daha çox bağladı.

Sözlə ifadə edilməyəcək gözəl anlar yaşadım bu 10 ildə. Amma hər şeyin bir sonu olduğu kimi, bu 10 ilin də son günü gəlib çatdı. Ömrümün 10 illik bir kitabının son səhifəsini bu gün yazdım və bitdi.

Bu müddət ərzində üzərimdə əziyyəti, zəhməti, haqqı olan hər bir insana bir ömür minnətdaram. Mənə bu telekanalda adi bir işçi kimi inanıb müəyyən qədər işini bilən bir Ramiz Mirzəzadəyə çevrilməyimə dəstək olan insanlar var ki, onların zəhmətini heç vaxt unutmayacam.

Amma zaman, məqam, vəziyyət elə gətirdi ki, doğulub böyüdüyüm yerdən, mənə əziz olan məkandan öz peşə bayramımda öz istəyimlə ayrılmaq qərarı aldım.

Mənə inanan, məni dəstəkləyən, məni özünə yaxın bilən hər kəsə minnətdaram. Var olun hər zaman. İnanıram ki, hər şey hamı üçün bundan sonra daha da yaxşı olacaq".

Digər Xəbərlər
Xəbər Lenti
9 Avqust 14:40 "Bu, məni dəli edir"