Azərbaycan futbolu ilə yaxından maraqlananlar Mohammed Kadirini mütləq ki, xatırlayır.

Vaxtilə “Avstriya” (Vyana, Avstriya), “Arsenal” (Tula, Rusiya), “Dinamo” (Kiyev, Ukrayna), “Çernomorets” (Odessa, Ukrayna), “Hönved” (Budapeşt, Macarıstan) kimi komandaların formasını geyinib, 2023/24 mövsümünü “Araz-Naxçıvan”da keçirən qanalı dayaq yarımmüdafiəçi.

Kadiri bu gün də Azərbaycanda olmalı, “Mingəçevir”in heyətində “Qəbələ” ilə pley-off qarşılaşmasına hazırlaşmalıydı.

Ötən mövsüm Mingəçevirin eyniadlı komandası ilə 1 illik müqavilə bağlayan qanalının sözləşməsinin müddəti bu ayın sonunda başa çatırdı.

Lakin o, yanvarda qeyri-adi səbəb göstərərək komandanı tərk etmək məcburiyyətində qaldı.

Mohammed Qananın Şimal bölgəsinin kral ailəsinin kral nəslindəndir. Uşaqlıqdan varlı və imtiyazlı həyat yaşayıb. Yəni pula görə klubları əlcək kimi dəyişməyib.

Kadirinin babasının varidatı atasına qalıb və uzun müddət onun adında olub. 2025-ci ilin dekabrında futbolçunun atası dünyasını dəyişib. Var-dövlət vərəsəliyi keçib Mohammedlə digər dörd qardaşının adına.

Kadiri qış fasiləsində atasının vəfatı ilə bağlı Qanaya gedəndə real durumla yerində tanış olub. Bu günə qədər var-dövləti, şan-şöhrəti uşaqlıq arzusu olan futbola qurban verirdisə, 30 yaşdan sonra yüksək səviyyədə futbol oynamağın mümkünsüzlüyünü anlayaraq mirasa sahiblənməyi vacib bilib.

Mingəçevirə qayıdaraq başına gələnləri və bundan sonrakı arzularını rəhbərliyə çatdırıb. Heç kimə ona mane olmayıb. Əksinə, qarşısında “yaşıl” işıq yandırılıb.

O da öz növbəsində 20 ilə yaxın məşğul olduğu sənətdən uzaqlaşaraq krallığı gələcək nəsillərə rahat şəkildə təhvil vermək üçün Qanada yaşamağı qərara alıb.

Ona görə deyiblər ki, qulaq hər gün bir söz eşitməsə, kar olar.

HƏBİB / SPORTİNFO.AZ