.jpg)
"Kəpəz" mövsümə məğlubiyyətlə başladı.
"Sumqayıt"ın qonağı olan bölgə klubu 0:2 hesablı məğlubiyyətə üzüldü.
Meydan sahibləri çox sayda qol fürsətini sağa-sola xərclədi.
Əks halda fərq daha böyük ola bilərdi.
İki rəqib arasında ciddi uçurum aydın sezilirdi.
Və 1 matç da yetərli oldu ki, "Kəpəz"in gələcəyi ilə bağlı bədbin danışasan.
İşlərinin heç də asan olmayacağını düşünəsən.
Premyer Liqada yerini qorumaq üçün Adil Şükürovun komandası növbəti dəfə fədakarlıq etməli olacaq.
Hər mövqedə boşluq göz çıxardır.
Bu hələ o qədər də iddialı olmayan, ciddi heyət sıxıntısı yaşayan "Sumqayıt"dır.
Deməli, digər rəqiblərlə mübarizə daha böyük güc tələb edəcək.
Belədə yeni transferlər labüddür.
Amma nə zaman?
Klub çox gecikir. Bundan sonra yaxşı futbolçu tapmaq bir problemdir, adaptasiyanı arxada qoyması iki.
Artıq liqa başlayıb. İtirilən xalların bərpası elə də asan olmayacaq.
Gəncəli tərəfdarlar indidən növbəti ağır sınağa hazır olsunlar.
Oxşar problemlərlə iki mövsümü uğurla arxada qoymaq mümkün olub.
Üçüncü cəhd daha ağır görünür. Gözləyək...
XANOĞLAN İMANOV
