Rusiya son həftələrdə Ukraynaya müdaxilənin ilkin mərhələlərində zəif çıxış etdiyi güman edilən yüksək vəzifəli hərbçiləri işdən çıxarır.
Bu barədə İngiltərə Müdafiə Nazirliyi məlumat yayıb.
Məlumata görə, Rusiyanın elit I Qvardiya Tank Ordusuna komandanlıq edən general-leytenant Sergey Kisel Xarkovu ələ keçirə bilmədiyi üçün vəzifəsindən uzaqlaşdırılıb.
Bundan başqa, “Moskva” kreyserinin batmasından sonra Rusiyanın Qara dəniz donanmasına komandanlıq edən vitse-admiral İqor Osipovun da fəaliyyətinin dayandırıldığı bildirilib.
“Çox güman ki, Rusiyanın baş qərargah rəisi Valeri Gerasimov vəzifəsində qalacaq. Amma onun Prezident Putinin etimadını nə qədər qoruyub-saxlayacağı bəlli deyil”, - məlumatda deyilib.
Rusiya rəhbərliyinin bu addımının rus ordusunun döyüş meydanındakı üstünlüyü bərpa etməsini çətinləşdirəcəyi vurğulanıb.
