COP29

Ev almaq istəyənlərin NƏZƏRİNƏ: Bakıda mənzillər UCUZLAŞACAQ

16 İyun 08:50 Gündəm 1 626
Ev almaq istəyənlərin NƏZƏRİNƏ: Bakıda mənzillər UCUZLAŞACAQ

“Böyük Qayıdışa dair Dövlət Proqramının icra olunması Bakının və Sumqayıtın mənzil bazarına təsir edəcək, burada qiymətlərin stabilləşməsinə kömək edəcək”.

Bunu Böyük Qayıdışa dair I Dövlət Proqramının mənzil bazarına təsirlərini şərh edən zaman daşınmaz əmlak üzrə ekspert Elnur Fərzəliyev sfera.az-a açıqlamasında bildirib.

O qeyd edib ki, birinci dövlət proqramının icrası 2026-cı ilin sonuna qədər davam edəcək və bu müddətdə 140 min məcburi köçkün öz yurd-yuvalarına qayıdacaq. E.Fərzəliyev bildirib ki, indiyə qədər bir neçə min məcburi köçkün yurd-yuvalarına qayıdıb. Ekspert qarşıdakı dövrdə qayıdacaq insanların sayının daha da artacağını vurğulayıb.

Onun fikrincə, qayıdış prosesinin güclənməsi mənzil bazarında satışa çıxarılan ucuz evlərin sayının artmasına səbəb olacaq ki, bu da qiymətlərə təsir edəcək:

“Məcburi köçkünlər üçün tikilən mənzillər ilk dəfə 2021-ci ildə satışa çıxarılıb. Həmin mənzillər bazar qiymətlərindən aşağı qiymətə satışa çıxarıldı. Daha sonra mərhələli şəkildə bu tip ucuz evlərin satışa çıxarılması həyata keçirilib və bu proses davam edir. Satışda ucuz evlərin sayının artması aztəminatlı ailələlərin ev almaq arzularını gerçəkləşdirdi. Çünki həmin evlər həm aşağı qiymətə təklif edilir, həm də uzunmüddətli ipoteka kreditləri ilə satışı həyata keçirilir. Bakıətrafı, eyni zamanda digər şəhərlərdə olan mənzillər də məcburi köçkünlər öz yurd-yuvalarına qayıtdıqca aşağı qiymətə satışa çıxarılacaq”.

Elnur Fərzəliyev düşünür ki, Xankəndiyə və digər yaşayış məntəqələrinə qayıdan insanların sayı artdıqca Bakının mənzil bazarında tələb sabitləşəcək:

“Qarabağ Universitetinin açılması tələbələrin bir hissəsini bu əraziyə yönəldəcək və bu, qismən də olsa, Bakının kirayə və mənzil bazarında stabillik yaranmasına kömək edəcək. Bundan başqa, məcburi köçkünlərin öz yurdlarına qayıtması həmin ərazilərdə turizm sektorunun inkişafına, yeni iş yerlərinin açılmasına şərait yaradacaq. Bu proses də Bakıya insan axınını mərhələli şəkildə azaldacaq. Paytaxta insan axını azaldıqca burada daşınmaz əmlaka tələb əvvəlki qədər güclü olmayacaq. Bu isə qiymətlərin stabilləşməsinə gətirib çıxara bilər”.

Ekspert onu da bildirib ki, Bakının mənzil bazarında qiymət artımı artıq dayanıb, bazarda stabillik yaranıb. Onun fikrincə, belə vəziyyət Qarabağ və Şərqi Zəngəzura qayıdışla əlaqədar daha uzun müddət davam edə bilər:

“Bakıda mənzil bazarında yüksək qiymət artımları 2023-cü ilin oktyabrına qədər davam edib. Sonrakı aylarda qiymət artımı baş vermədi. Yalnız 2024-cü ilin fevral və mart aylarında ipoteka kreditlərinin artması ilə əlaqədar tələb gücləndi və bu, qiymətlərə müəyyən qədər artırıcı təsir göstərdi. Amma hazırda daşınmaz əmlak bazarında çox ciddi sakitçilik hökm sürür, əvvəlki kimi güclü alıcı qüvvəsi yoxdur. Bazarda alıcı olmayanda qiymətlər artmır. Qiymət yalnız alıcı kütləsi çox olanda, rəqabət güclənəndə baş verir”.

Digər Xəbərlər
Xəbər Lenti