Azərbaycan millisinin və “Dinamo”nun hücumçusu Mahir Emreli ciddi zədə alıb.
Bu haqda yerli “sportklub.n1info.hr” məlumat yayıb.
26 yaşlı forvard Zaqreb təmsilçisinin heyətində Sloveniya “Roqaşka”sına qarşı keçirilən hərəsi 30 dəqiqədən ibarət 3 hissəli yoxlama görüşündə (1:0) sıradan çıxıb.
Emreli bu səbəbdən qarşılaşmanın 60-cı dəqiqəsində əvəzlənib. Baş məşqçi Sergey Yakiroviç onun zədəsinin ciddi olduğunu açıqlayıb.
Mütəxəssis forvardın dirsək və bud nahiyəsində ağrılarının olduğunu, bu üzdən uzun müddət kollektivdən kənarda qalacağını söyləyib.
Millimizin üzvü ilə bağlı son qərar Maqnit Rezonans Tomoqrafiyasından (MRT) keçdikdən sonra veriləcək. Ancaq onun hətta mövsümü başa vurmaq ehtimalı da istisna edilmir.
Redaksiyamıza daxil olan son məlumata görə, Mahir yaxın günlərdə əməliyyat ediləcək.
Rəqiblə ikili mübarizə zamanı ciddi zədə alan forvardın minimum 3 ay yaşıl sahələrdən kənarda qalacağı dəqiqdir.
SPORTİNFO.AZ
