AÇ-2020-nin seçmə mərhələsinin sonuncu turunun oyunları keçirilib. Sportinfo.az xəbər verir ki, Azərbaycanın yer aldığı E qrupunda Xorvatiyadan sonra Uels millisi də final mərhələsinə vəsiqəni təmin edib.
Sonuncu turda evdə Macarıstan millisini 2:0 hesabı ilə məğlub edən Rayan Qiqqzin yetirmələri xallarının sayını 17-yə çatdıraraq bu hüquqa yiyələnib. Azərbaycanı 2:0 hesabı ilə məğlub edən Slovakiya isə 13 xalla qrup üçüncüsü olub.
Bunadək 18 komanda - İngiltərə, Almaniya, İspaniya, Hollandiya, İtaliya, Türkiyə, Fransa, Portuqaliya, Çexiya, Ukrayna, İsveçrə, Danimarka, İsveç, Polşa, Avstriya, Belçika, Rusiya, və Finlandiya final mərhələsinə vəsiqə qazanıb.
Qalan 4 vəsiqənin sahibi UEFA Millətlər Liqasının 4 Liqasında keçiriləcək "pley-off" oyunlarından sonra müəyyənləşəcək. Avropa çempionatının qrup mərhələsinin 3, 1/4 finalın 1 oyunu Bakı Olimpiya Stadionunda keçiriləcək.