.jpg)
Birinci divizionun XII turunun "Kəpəz"lə oyununda hakimi təhqir etdiyi üçün AFFA İntizam Komitəsi tərəfindən cəzalandırılan "Neftçi"nin əvəzedici komandasının baş məşqçisi Mahmud Qurbanov qərara münasibət bildirib.
Gənc mütəxəssis Sportinfo.az-a açıqlamasında referini söymədiyini deyib. O, İK-in qərarından apellyasiya şikayəti veriləcəyini söyləyib:
"Orada heç nə baş verməyib. Heç kimi təhqir etməmişəm. Çox maraqlıdır, niyə cəza veriblər? Sadəcə, qırmızı vərəqə epizoduna görə etiraz etmişəm. Başqa heç nə olmayıb.
Yəqin, İK-in qərarı ilə bağlı apellyasiya şikayəti verərik. Çünki oyun vaxtı kimsə söyülməyib".
Qeyd edək ki, İK-in qərarına əsasən, Qurbanov oyunun 33-cü dəqiqəsində hakimə qarşı təhqiredici ifadələr işlətdiyinə görə 5 oyun cəzalanıb, klubu isə 400 manat cərimə olunub. Məşqçiyə verilmiş 5 oyun cəzanın 3-ü şərti cəza kimi tətbiq edilib və 3 ay sınaq müddəti verilib. Bu müddət ərzində məşqçi yenidən cəzalanacağı təqdirdə sanksiyanın növbəti hissəsi qüvvəyə minəcək.
"Neftçi-2" - "Kəpəz" oyununun (2:0) baş hakimi Rauf Allahverdiyev olub.
