“Zirə” 13 tura yeddinci qələbəsini Yevlaxda qazandı.
Rəşad Sadıqov bu səfərdən çox ehtiyat edirdi.
«Kəpəz» onu yanıltdı. «Nominal ev sahibləri «Zirə»ni oyunboyu qonaqlarıı narahat elədi» ifadəsini işlətmək olmaz.
«Zirə» müdafiə futbolu oynamadı. İlk hissənin əvvəlindən başlayaraq, «Kəpəz»in üzərinə getdi. Düzdür, hər belə hücum istədikləri kimi alınmırdı, amma Georgi Papunaşvilinin başında dayandığı, ağlı və ayağıyla idarə etdiyi yarımmüdafiə xətti yetərincə fəal təsir bağışladı. Gürcüstanlı legionerin sabiq komandasına qol vurmaq istəyinə isə Yusif İmanov mane oldu.
«Zirə» 1 il əvvəlki günlərini xatırladır yenə. Müdafiə fazasında yeni inkişaf mərhələsinə keçid ediblər. «Kəpəz»in cərimə meydançasına daxil olmasına, Tiaqo Silvanın kefinə soğan doğramaqlarına imkan vermədilər.
Qələbə qazanmasaydılar, Rəşad Sadıqovu turun ən bəxtsiz baş məşqçisi adlandırardıq. Leroy Mikelsin akrobatik vuruşuyla hesabı açan «Zirə» ilk 1 saatın bütün acığını çıxmış oldu.
Hə, Yeqor Boqomolski… Yox, 71-ci dəqiqədə Mikelsi əvəzləyən belaruslu hücumçu «qol orucu»nu pozmadı. Amma ikinci qolun vurulmasında yaxından iştirak etdi. Sabiq «Neftçi»li topun arxasınca axıradək getməsəydi, nə müdafiəçiləri çaşbaş salan olacaqdı, nə də İssa Cibrila zərbə mövqeyinə çıxacaqdı. Sadıqov torun silkələndiyi epizodun tamamında, yəqin ki, ilk dəfə Boqomolskini «Zirə»yə gətiriməsinə sevindi, ürəyində «buna da şükür!» söylədi.

ELXAN