“Sabah”ı tərk edəcək daha bir futbolçunun adı bizə məlum olub.
Namiq Ələsgərovla yanaşı, Neqoş Kupusoviç də karyerasını başqa klubda davam etdirməlidir.
“Srvena Zvezda”nın və Serbiyanın U-19 millisinin keçmiş üzvü Vasili Berezutskinin planlarına daxil deyil.
Geridə qalan mövsümdə meydanda az vaxt keçirıən hücumçu ehtiyat oyunçular skamyasının “daimi sakini” kimi yadda qalıb. Berezutski “11-lik” uğrunda mübarizədə Pavol Şafrankoya layiqli rəqib arzusundadır, daha Kupusoviç kimisi yox.
İş burasındadır ki, 24 yaşlı forvardla yolları ayırmaq asan məsələ deyil. Klub 2024-cü ilin yayında onunla 3 illik sözləşmə əldə edib.
Daha 2 illik müqavilə qüvvədə olduğundan, Neqoşla ortaq məxrəcə gəlmək mütləqdir. Ya hansısa məbləğdə təzminat ödənməlidir, ya da başqa kluba icarəyə verilməlidir.
Hazırda bu yöndə müəyyən işlər görülür.
HƏBİB / SPORTİNFO.AZ
