Azərbaycan futbolunda növbəti tarixi hadisə yaşandı – “Sabah” ilk dəfə ölkə kubokunu qazanaraq tarix yazdı.

Rəqib kiçik ad deyildi – “Qarabağ”, ölkənin son onillikdəki ən dominant və beynəlxalq səviyyədə tanınan klubu.

Final matçı təkcə idman baxımından deyil, həm də emosional və simvolik baxımdan dəyərli idi. Oyunun 90-cı dəqiqəsinə qədər 1:2 hesabı ilə geridə olan “Sabah”, son saniyələrdə – 90+5-ci dəqiqədə hesabı bərabərləşdirdi.

Bu, sadəcə bərabərlik deyildi; bu, inamın, ruhun və təslim olmama əzminin təcəssümü idi.

Əlavə vaxtda, matçın 120-ci dəqiqəsində Tellur Mütəllimovun vurduğu qələbə qolu ilə "Sabah" yalnız kuboku deyil, həm də bir fəlsəfəni, bir ruhu, bir ideyanı qələbəyə daşıdı.

Bu qələbə "Sabah"ın tarixində bir ilk oldu – həm ilk titul, həm də ilk dəfə Avropa Liqasına vəsiqə. Amma bu nəticə birdən yaranmadı.

İllərdir ki, “Sabah” klubu Azərbaycanda futbola sistemli yanaşan nadir klublardan biri kimi tanınır. Onların ən çox təqdir edilən tərəfi yalnız əsas komandaya fokuslanmaması, həm akademiyaya, həm infrastruktur layihələrinə, həm də uşaq futboluna xüsusi diqqət ayırmasıdır.

Bu yöndə görülən işlər artıq öz bəhrəsini verir.

Doğrudur, Premyer Liqanın cari mövsümü "Sabah" üçün arzuolunan alınmadı. Tez-tez nəticələrə görə tənqid olunurdular, bəzən oyun planı, bəzən komanda ruhu sual altına alınırdı.

Amma "Sabah"ın potensialı tam başqa şeydən xəbər verirdi. Çünki bu klub təkcə hazırkı nəticələrlə deyil, yaratdığı futbol mühiti ilə də seçilir.

Ölkədə az sayda klub var ki, öz akademiyasını bu qədər sistemli şəkildə inkişaf etdirir, seleksiya işinə bu qədər peşəkar yanaşır.

Kubokun finalı "Sabah" üçün əsl dönüş nöqtəsi oldu. Bu uğur təkcə əsas komandanın boş olan titul vitrininə bir kubok əlavə etmədi, eyni zamanda klubun daxili infrastruktur və fəlsəfəsinin doğruluğunu sübut etdi.

Bu, “Sabah”ın indiyə qədərki ən uğurlu mövsümüdür – bəli, Premyer Liqadakı nəticələr zəif ola bilər, amma tarixə düşən bir titul və Avropa Liqasına vəsiqə bu mövsümə tamamilə yeni çalar verdi.

Bu, həm də klubun ruhunun sübutudur. “Sabah” birinci dəfə deyil ki, mövsümün sonlarında həlledici anlarda xarakter nümayiş etdirir.

Yada salaq, ötən mövsüm son turda “Neftçi” ilə dramatik görüşdə qələbə qazanaraq avrokuboklara yollanmışdılar.

Deməli, klubun yaşının az olması (cəmi 8 il) artıq onun peşəkarlıq səviyyəsinə təsir etmir. Çünki burada klub ruhu, xarakter, və oyunçuların inancları formalaşıb.

Tellur Mütəllimovun son dəqiqədə vurduğu qolun simvolik mənası var. Bu qol həm tarixi dəyişdi, həm də “Sabah”ın statusunu: iddialı klubdan titullu kluba çevirdi.

Lakin bu sadəcə son deyil, bir başlanğıcdır. İndi klubun qarşısında daha böyük sınaqlar var – avrokuboklar.

“Sabah” ölkə daxilindəki uğurları Avropaya da daşıya bilərsə, bu, təkcə klub üçün deyil, ümumilikdə Azərbaycan futbolu üçün də qazanım olacaq.

Mövsümün sonunda belə dramatik dönüş yaşamaq çox az komandaya nəsib olur. Bu dönüşlər təsadüfi baş vermir.

Onların arxasında uzun müddətli planlaşdırma, doğru məşqçi seçimi, davamlılıq və klub daxilində düzgün idarəetmə dayanır.

“Sabah” bu komponentləri son illərdə bir araya gətirə bilən nadir klublardan biri olub. İndi isə bu modelin nəticəsini həm daxildə, həm də beynəlxalq arenada görmək zamanıdır.

Azərbaycan futbolunda yeni bir səhifə açılıb. Bu səhifədə “Sabah”ın adı təkcə titullu klub olaraq yox, həm də inkişaf modeli olaraq qalmalıdır.

Bu qələbə klubun nə qədər düzgün istiqamətdə olduğunu göstərir və futbol ictimaiyyətinə onu aydın mesaj verir: sistem və sabitlik sonda qalib gəlir.

Xəlil Sadıq