Sportinfo.az xəbər verir ki, "Qəbələ"nin təsisçisi və əsas himayədarı, ölkənin ən iri holdinqlərindən biri olan “Gilan Holding” cəbhədə mübarizə aparan ordumuza dəstək məqsədi ilə Azərbaycan Respublikası Silahlı Qüvvələrinə Yardım Fonduna 1 milyon manat ianə edib.

“Ali Baş Komandanımız cənab İlham Əliyevin rəhbərliyi ilə ölkəmizin ərazi bütövlüyünün qorunması və işğal edilmiş torpaqlarımızın azad edilməsi uğrunda gedən döyüşlərdə əldə olunan inamlı qələbələr son günlər dünya ictimaiyyətində və KİV-ində ən əsas müzakirə mövzusuna çevrilmişdir.

Ordumuzda xidmət edən Mübarizlərin qəhrəmanlığı və şücaəti, xalqımızın birliyi və tarixi qələbələrimizin sədası bütün dünyaya yayılmaqdadır.

Şanlı Azərbaycan Ordusu ilə qürur duyuruq! Bu münasibətlə xalqımızı təbrik edir, tarixi missiyamızda iştirak edən hər bir kəsə uğurlar diləyirik!” - deyə “Gilan Holding”dən bildirilib.

Məlumat üçün bildiririk ki, “Gilan Holding” Səfərbərlik və Hərbi Xidmətə çağırış üzrə Dövlət Xidməti tərəfindən ordu sıralarına cəlb edilən əməkdaşlarına əmək haqlarını 2 qat ödəyir. Bu, həmin əməkdaşların xidmət etdikləri dövr ərzində davam edəcək.

Silahlı Qüvvələrə Yardım Fondu Azərbaycan Respublikası Prezidentinin 2002-ci il 17 avqust tarixli Fərmanı ilə Silahlı Qüvvələrimizin müasir tələblər səviyyəsində inkişafını təmin etmək, onun maddi-texniki bazasını möhkəmləndirmək və zəruri sosial tədbirləri maliyyələşdirmək məqsədilə yaradılıb.