"Mən müdafiədə oturan komanda istəmirəm" -

"Mən müdafiədə oturan komanda istəmirəm" - FOTOLAR

Azərbaycan Premyer Liqasında II tura yekun vurulub.

“Qəbələ” mövsümdə ilk səfər oyununu Bakıdakı “Bank Respublika Arena”da keçirib.

“Qırmızı-qaralar” “Sabah”ın qonağı olub. Baş məşqçi Elmar Baxşıyev ötən turun “Zirə” ilə görüşündəki start “11-liy”ində iki dəyişiklik edib. Vinko Medimoreç və İdris İnqilablı ilk dəqiqələrdən meydana çıxıbsa, Murad Musayevlə Rüfət Əhmədov start heyətdən kənarda qalıb.

Meydan sahibləri görüşə daha fəal başlasa da, oyunun ilk dəqiqələri daha çox qarşılıqlı hücumlarla diqqət çəkib. “Qəbələ” ilk təhlükəli epizodunu 14-cü dəqiqədə yaradıb.

Asif Məmmədov sağ cinahdan irəliləyərək qapıya paralel ötürmə edib. Qapı önündə bir neçə toxunuşdan sonra topa yiyələnən Nikolas Rayselin zərbəsində dəqiqlik çatmayıb. Üç dəqiqə sonra bakılılar ərazi üstünlüyünü qola çevirib – 1:0.

Az keçməmiş paytaxt təmsilçisi fərqi iki topa çatdırıb ki, “qırmızı-qaralar” buna Rövlan Muradovun yaddaqalan zərbəsi ilə cavab verib. Hissənin ikinci yarısında Ülvi İsgəndərovun zərbəsi də təhlükəli alınıb. Lakin rəqib qapıçı topu dəf edə bilib.

İkinci hissəyə dəyişikliklə başlayan “Qəbələ”də Stefan Vukçeviç meydana daxil olub. Fasilədən sonra böyük qüvvə ilə hücuma atılan “qırmızı-qaralar” rəqibi təzyiq altında saxlayıb.

Merab Qiqauri öncə başla, sonra uzaq zərbə ilə qapını nişan alıb. Asif Məmmədovun da zərbəsi yaddaqalan olub. İkinci yarının ilk dəqiqələrində bakılıların müdafiəçiləri də bir neçə zərbəni blok edə bilib.

Nikolas Raysel ardıcıl iki epizodda hücumu qapıya zərbə ilə tamamlasa da, hesabda fərqi azaltmaq mümkün olmayıb. Hissənin ortalarında paytaxt təmsilçisi daha bir qol vurmağı bacarıb. Bu qoldan sonra görüş qarşılıqlı hücumlar şəraitində davam edib.

Baxşıyev Ehtiram Şahverdiyev və Cavid Hüseynovu meydana buraxmaqla oyunun axarını dəyişməyə çalışıb. Görüşün sonlarında say üstünlüyünə yiyələnən komandamız yenidən hücumlarının sayını artırıb.

Stefan Vukçeviçin cərimə meydanı daxilindən zərbəsinə rəqib qapıçı reaksiya verib. Nikolas Raysel və Qismət Alıyevin zərbələri qeyri-dəqiq olubsa, Yurgen Qoxanın başla toxunuşu istənilən kimi alınmayıb. Beləliklə, “Qəbələ” mövsümün ilk səfər oyununda paytaxtdan xalsız dönüb.

"Qəbələ"nin baş məşqçisi Elmar Baxşıyev: "İki fərqli hissə izlədik. İlk yarıda istədiyimiz futbolu görmədim. Amma fasilədən sonra istədiyim komanda meydanda idi. Çatışmazlıqlarımız var. Bizə vaxt lazımdır. Getdikcə daha yaxşı kollektiv olacağıq".

O bildirib ki, komanda yeni olduğu üçün daha artığını tələb edə bilmir: "Müdafiədə daha yaxşı çalışmalıyıq. Yenə deyirəm, vaxta ehtiyacımız var".

40 yaşlı mütəxəssisin sözlərinə görə, sərəncamında olan 23 futbolçunun hamısına inanır: "Cavid oynamalı idi. Ona görə şans verdik".

Baş məşqçi fərdi səhvlərin komandaya uyğunlaşmaması ilə əlaqələndirib: "Xəttlərarası əlaqə yaxşı vəziyyətdə deyil. İkinci hissədə göstərdiyimiz oyun keyfiyyətli idi. Bu oyunu istəyirəm. Müdafiədə oturan komanda istəmirəm".

Baxşıyev yeni hücumçu istədiyini söyləyib: "Yeni qoşulan braziliyalı futbolçu çox keyfiyyətlidir. Çempionatın tapıntısı ola bilər".

Mütəxəssis cari mövsümdəki hədəflərini açıqlayıb: "Bizi öncə avrokuboklar yox, komandanın formalaşması maraqlandırır. Bundan sonra iddiamız da arta bilər".

Baş məşqçi deyib ki, "Sabah" barədə danışması düzgün deyil: "Mən öz komandama cavabdehəm. "Qəbələ" güclənib. Daha yaxşı oyun göstərəcəyimizə inanıram".

E.Baxşıyev əllərində olan futbolçularfan maksimum istifadə etdiklərini vurğulayıb: "Vuran ayaqlarımız yoxdur. Ön xətdə bizə faydalı oyunçuların üzərində dayanmaq istəyirik".

O, Anar Nəzirovun səhvi barədə də danışıb: "Səhv hər zaman olur. Anara inanırıq".

“Sabah” - “Qəbələ” 3:0

“Bank Respublika Arena”, tamaşaçısız

Baş hakim: Əliyar Ağayev

Baş hakimin köməkçiləri: Zeynal Zeynalov, Akif Əmirəli

Dördüncü hakim: Tural Qurbanov

Hakim-inspektor: Fariz Yusifov

AFFA nümayəndəsi: Rüfət Əmirov

Sarı vərəqələr: Mario Marina, 38 (qeyri-idman hərəkəti); Slavik Alxasov, 49, 77 (qeyri-idman hərəkəti) // Asif Məmmədov, 4 (qeyri-idman hərəkəti); Rövlan Muradov, 45+2 (qeyri-idman hərəkəti); Qismət Alıyev, 62 (qeyri-idman hərəkəti); Vinko Medimoreç, 70 (qeyri-idman hərəkəti); Yurqen Qoxa, 85 (qeyri-idman hərəkəti)

Qırmızı vərəqə: Slavik Alxasov, 77

Qollar: Coşqun Diniyev, 17; Bəhlul Mustafazadə, 28; Ramil Şeydayev, 64

Artırılan vaxt: I hissədə 2 dəq; II hissədə 3 dəq.

“Sabah”

1. Saşa Stamenkoviç (k)

19. Təmkin Xəlilzadə

(11. Ozan Can Kökcü, 55)

7. Coşqun Diniyev

(17. Məhəmməd Mirzəbəyov, 81)

4. Bəhlul Mustafazadə

90. Ramil Şeydayev

(23. Amadu Diallo, 73)