"Rəhbərliyə də xahişimi çatdırmışam ki..."

Premyer Liqanın 2020-2021-ci illər mövsümündə ilk tura yekun vurulub.

“Qəbələ” mövsümdə ilk oyununu evdə keçirib.

Son rəsmi matçını martın 7-də “Sumqayıt”a qarşı keçirən (5:0) “qırmızı-qaralar” 169 gündən sonra Qəbələ şəhər stadionuna çıxıb. Komandamızın baş məşqçisi Elmar Baxşıyev ilk dəqiqələrdən iki debütanta şans verib. Yeni transfer Yurgen Qoxa və 18 yaşlı Rüfət Əhmədov start “11-lik”də yer alıb.

Qarşılaşmaya fəal başlayan “Qəbələ” erkən qola sevinib. Rövlan Muradovun ardıcıl künc zərbələrindən ikincisi zamanı uzaqlaşdırılan top Asif Məmmədovun önünə düşüb.

Təcrübəli yarımmüdafiəçinin uzaqdan zərbəsindən sonra top rəqib futbolçuya toxunaraq tora qovuşub -1:0. Buraxılan qoldan sonra qonaqlar üstünlüyü ələ almağa çalışıb.

“Qırmızı-qaralar” 16-cı dəqiqədə fərqi artırmağa yaxın olub. Rodriqo Qattas cərimə meydanı daxilindən qüvvətli zərbə endirsə də, çərçivəyə düşməyib.

Hər iki komandanın topa daha çox nəzarət etmək uğrunda mübarizə apardığı dəqiqələrdə paytaxt təmsilçisi sağ cinahla bir neçə təhlükəli hücum qura bilib. Bunlardan biri Ağabala Ramazanovun hesabda tarazlıq yaratması ilə nəticələnib – 1:1.

Bu qoldan sonra ardıcıl hücumlar təşkil edən “qırmızı-qaralar” bir neçə təhlükəli zərbə ilə yadda qalıb. Künc zərbələri zamanı Yurgen Qoxa ilə Ülvi İsgəndərovun başla toxunuşları zamanı top çərçivəyə düşməyib. Rövlanın zərbəsinin önünü isə bakılılar kəsib.

İkinci hissəyə qonaqlar daha fəal başlayaraq ardıcıl bir neçə hücum təşkil edib. “Qəbələ” 57-ci dəqiqədə qola yaxın olub. Ülvinin cərimə meydanı daxilindəki Rövlana ötürməsinin önünü müdafiəçilər kəsib.

Künc zərbəsini İsgəndərov başla qapasa da, dəqiq olmayıb. Müdafiədə etibarlı oynayan “qırmızı-qaralar” uzaq zərbələrlə rəqib qapıçıya gərginlik yaşadıb. Merab Qiqauri iki, Nikolas Raysellə Rövlan Muradov hərəyə bir dəfə çərçivəni nişan alsa da, hesab dəyişməyib.

Görüşün sonluğu da qarşılıqlı hücumlarla keçib. Final fitinə 11 dəqiqə qalmış Anar Nəzirov topu rəqibin ayaqları altından çıxararaq hesabın dəyişməsinə imkan verməyib.

Ev sahibləri isə Rodriqo Qattasın uzaq, Murad Musayevin yaxın məsafədən zərbələri ilə təhlükə yaratmağı bacarıb. Beləliklə, “Qəbələ” mövsümə qollu sülhlə start verib.

“Qəbələ”nin baş məşqçisi Elmar Baxşıyev: “Uzun müddətdən sonra futbolun qayıtması həm bizi, həm sizi sevindirir. Əlbəttə, asan olmayacağını bilirdik. Uzun müddət futbolsuz qalmışdıq. Hər məşqdə hiss edirik ki, futbolçular əvvəlki formalarına qayıdırlar. Çatışmazlıqlarımız olsa da, ümid edirik ki, vaxt keçdikcə daha güclü “Qəbələ” görəcəyik. İlk oyun həmişə çətin olur. Həm “Qəbələ”, həm də “Zirə” bu gün hücuma meylli futbol oynadı. Matçın ən ədalətli nəticəsi kimi heç-heçəni görürəm. Hər iki komandanın şansları var idi. İnanıram ki, getdikcə daha da komplektləşəcək, komanda kimi formalaşacaq və yaxşı oyun nümayiş etdirəcəyik. Rəhbərliyə də xahişimi çatdırmışam ki, güclənməyə ehtiyacımız var. Qarşıdakı günlərdə yeni oyunçuların gəlməyi gündəmdədir. Hələlik gedən futbolçuların yerini doldurmaq istəyirik. İvitsa Juniç getdi və onun yerinə Yurgen Qoxa gəldi. Klesio Bauk və Fernan Lopesin yerini doldura bilməmişik. Bu yöndə işlər davam edir. Nikolas Raysel çox keyfiyyətli futbolçudur. O, hücuma meylli zonaların hər birində oynamağı bacarır. Verilən tapşırıqları layiqincə yerinə yetirir. Bugünkü matçda rəqibə uyğun sxem seçmişdik və onun hücumun arxasında oynaması lazım idi”.

“Qəbələ” – “Zirə” 1:1

Qəbələ şəhər stadionu, tamaşaçısız

Baş hakim: Kamal Umudlu

Baş hakimin köməkçiləri: Zeynal Zeynalov, Cavanşir Yusifov

Dördüncü hakim: Rəşad Əhmədov

Hakim-inspektor: Ramil Diniyev

AFFA nümayəndəsi: Mübariz Hüseynov

Sarı vərəqələr: Asif Məmmədov, 11 (qeyri-idman hərəkəti); Yurqen Qoxa, 13 (qeyri-idman hərəkəti); Rodriqo Qattas, 84 (hakimin qərarına etiraz) // Hacıağa Hacılı, 14, 90+1 (qeyri-idman hərəkəti); Lazar Corceviç, 18 (qeyri-idman hərəkəti); Şəhriyar Rəhimov, 45+1 (qeyri-idman hərəkəti)

Qırmızı vərəqə: Hacıağa Hacılı, 90+1

Rəsmi şəxsə göstərilən sarı vərəqə: Elmar Baxşıyev, 81 (hakimin qərarına etiraz)

Qollar: Asif Məmmədov, 3 // Ağabala Ramazanov, 28

Artırılan vaxt: I hissədə 1 dəq; II hissədə 4 dəq.

“Qəbələ”

1. Anar Nəzirov (k)

8. Qismət Alıyev

11. Asif Məmmədov

28. Murad Musayev

70. Ülvi İsgəndərov

(74. Yusif Nəbiyev, 85)

77. Merab Qiqauri