Kamillo Duran artıq «Qarabağ»ın oyunçusu deyil.
Xəbər verdiyimiz kimi, Ağdam klubu dünən onu «Seltik»ə satıb.
Kolumbiyalı hücumçu bundan sonra karyerasını Şotlandiyada davam etdirəcək. Ağdam təmsilçisi onu «Seltik»ə satıb - tərəflər arasında bütün şərtlər razılaşdırılıb.
Bu sövdələşmə hansı şərtlər daxilində baş tutub:? İstər yerli, istərsə əd Şotlandiya mediasında müxtəlif rəqəmlərdən bəhs olunur.
Kimi 2 milyon funt-sterlinqdən danışır, kimi 2,5 milyondan, kimi də 3 milyondan.
Bilmək istəyirsizsə, qoy deyək - «köhlən atlar» cənubi amerikalının keçidindən 5 milyon avronun üstündə bir gəlir əldə edib.
“Qarabağ” Duranı ötən ilin yayında Portuqaliyadan - “Portimonense”dən 200 min funt sterlinqdən də az məbləğə transfer etmişdi. 24 yaşlı forvard ötən mövsüm Çempionlar Liqasında 10 oyunda 5 qol vurub.
Duranın gedişi ilə düşərgəni tərk edən futbolçuların sayı 9-a çatıb.
Ondan öncə Toral Bayramov, Emmanuel Addai, Ramil Şeydayev, Sami Mmae, Kevin Medina, Fabian Buntiç, Amin Ramazanov və Leandro Andrade ilə vidalaşıb.
SPORTİNFO.AZ
