"Qarabağ" 3 gün əvvəl Konfrans Liqası üçün iştirak ərizəsini UEFA-ya göndərdi.
24 nəfərlik siyahıda Bədavi Hüseynovun adının olması bir qədər təəccüblü göründü.
Axı müdafiəçinin ən azı 6 aylıq meydanlardan kənar qalacağı xəbəri verilmişdi. Olmaya, durumunda irəliləyiş var və növbəti təsnifat mərhələlərində onu meydanda görə bilərik?
Məsələ ilə bağlı klubun mətbuat xidmətinin rəhbəri Gündüz Abbaszadə Sportinfo.az-a bunları dedi:
"Bədavi Hüseynov bizim komandanın futbolçusudur. Bəli, hazırda zədəlidir.
İndiki halda təsnifat mərhələlərində oynaması real görünmür. Ümid edirik ki, qruplara qalacağıq və orda komandamıza kömək edə biləcək".