Yanvarın 17-də AFFA Oyunçuların Statusu və Transferi Komitəsinin 1-ci liqa təmsilçisi "İrəvan"la bağlı qərarı ictimaiyyətə təqdim olunmuşdu.
AFFA-nın mətbuat xidmətinin yaydığı məlumatda futbolçular Asim Əlizadə ilə Cavid Tağıyevə, məşqçi Aleksandr Jidkova olan xidmət haqqı məbləğinin 1 may 2024-cü il tarixinədək birdəfəlik ödənilməsi barədə qərar qəbul olunmuşdu.
Qərarın qüvvəyə mindiyi gündən 3 aya yaxın vaxt keçib. Son tarix kimi göstərilən 1 maya isə sayılı günlər qalıb.
Vaxtilə Azərbaycan millisinin qapısını qorumuş Aleksandr Jidkova geridə qalan müddətdə heç bir məbləğ ödənilməyib. Və yaxın günlərdə də ödəniləcəyinə ümid etmir.
Qapıçılar üzrə məşqçi Sportinfo.az-a açıqlamasında gözləmə limitinin dolduğunu və məlum məsələ ilə bağlı FİFA-ya şikayət etdiyini bildirib.
Klubla 2025-ci ilin yayına qədər müqaviləsi olan Jidkov ötən ilin sentyabrından dekabrına qədər “İrəvan”da Nazim Süleymanovun köməkçisi kimi çalışıb. Burada olduğu müddətdə ona maaş ödənilməyib.
HƏBİB
