Get-gedə avrokubok hədəfindən uzaqlaşan “Neftçi” çətin durumdadır.
Noyabrın 1-dən bu yana, son 5 matçda qələbənin nə olduğunu bilməyən “ağ-qaralar”ı çətin Yevlax səfəri gözləyir.
Komandaların məqsədləri və imkanları arasında yerlə göy qədər fərq olsa da, ilk dövrədəki qarşılaşmada “Neftçi”nin “Karvan-Yevlax”ın qapısına yol tapa bilmədiyini xatırtlatmaq mütləqdir – 0:0.
Bakılılar vəziyyəti nisbətən qaydasına salmaq istəyirsə, səfərdən qələbə ilə qayıtmalıdır.
“Neftçi”nin futbolçusu Kristian Kostin Sportinfo.az-a açıqlamasında şansları dəyərləndirib:
“Yeni baş məşqçinin gəlişindən sonra komandada müəyyən dəyişikliklər müşahidə olunur. Bunu “Sumqayıt”la matçda yəqin ki, gördüz. Birdən-birə zirvəyə qalxmaq olmur. Bir az vaxt lazımdır.
Yevlaxa qələbə dalınca yollanacağıq. İndiki vəziyyətdə rəqibin hansı komanda olması fərq etmir. Çünki bizə 3 xal lazımdır. Qış fasiləsindən öncə qələbə qazanıb azarkeşlərimizi sevindirmək istəyirik.
Əvvəlki oyunlardakı etdiyimiz səhvləri təkrarlamamalıyıq. Qalib gəlmək üçün əlimizdən gələn nə varsa, edəcəyik”.
Dekabrın 20-də Yevlax şəhər stadionunda keçiriləcək qarşılaşma saat 14:00-da başlayacaq.
HƏBİB
