Azərbaycanın 21 yaşadək futbolçulardan ibarət millisi Avropa çempionatının seçmə mərhələsində növbəti oyununu bu gün Şotlandiyaya qarşı keçirəcək.

Görüş Kilmarnok şəhərindəki “Ruqbi Park” stadionunda baş tutacaq və Bakı vaxtı ilə 22:30-da başlayacaq.

Bu, komandamızın Çexiya ilə 1:1 hesablı heç-heçədən sonra seçmə mərhələdə növbəti qarşılaşmadır.

1:1 və verilən müsbət siqnallar

Rəşad Eyyubovun komandası sentyabrın 25-də Masazırda Çexiya ilə qarşılaşıb və 1:1 hesablı heç-heçə edib. Millimizin qolunu Eşqin Əhmədov vurub.

Bu nəticə xüsusilə Çexiyanın səfərdə Azərbaycanı 5:0 hesabı ilə məğlub etdiyi əvvəlki görüş fonunda diqqət çəkir.

Eyyubov oyundan sonra futbolçuların xarakterini qeyd edib: “Çox ağır oyun keçirdik. İntensivlik baxımından tam 90 dəqiqə üçün hazır olmasaq da, oyunçularımıza xarakter göstərdiklərinə görə təşəkkür edirəm. Sonadək mübarizə apardılar.”

Eyyubov növbəti oyun öncəsi əsas məsələlərdən birinin düzgün bərpa olduğunu vurğulayıb.

Baş məşqçinin verdiyi digər mesaj isə komandanın real vəziyyətini göstərir: futbolçuların bir hissəsinin klublarında kifayət qədər oyun praktikası yoxdur və buna görə fiziki ritm problemi mövcuddur.

Eyyubov bu çatışmazlığı taktiki hazırlıq və yüksək motivasiya hesabına kompensasiya etməyə çalışdıqlarını bildirib.

Azərbaycan və Şotlandiya arasında son qarşılaşma 14 oktyabr 2025-ci ildə Bakıda keçirilib. Oyun kifayət qədər dramatik keçib və 3:3 hesabı ilə başa çatıb.

Azərbaycanın qollarını Xəyal Əliyev 2 qol və Şahin İbrahimov vurub. Şotlandiya tərəfindən isə Lourens, Qrehem və Kliol-Hardinq fərqlənib.

Bu nəticə göstərdi ki, yığmamız Şotlandiyaya qarşı rəqibin tempinə cavab verə və hücumda təhlükə yarada bilir. Eyni zamanda həmin görüşdə üç qol

buraxılması Şotlandiyanın keçidlərdə və hücumun son mərhələsində yaratdığı problemləri də göstərmişdi.

Şotlandiyanın hazırkı vəziyyəti

Şotlandiya seçmə mərhələsində Azərbaycanla oyuna qədər 8 xal toplamışdı və qrupda Azərbaycanı qabaqlayırdı. Komandanın son nəticələri belədir:

Şotlandiya – Cəbəllütariq 12:0
Cəbəllütariq – Şotlandiya 0:2
Şotlandiya – Bolqarıstan 1:0
Şotlandiya – Çexiya 0:0
Portuqaliya – Şotlandiya 3:0

Yəni son beş oyunda Şotlandiya 2 qələbə, 2 heç-heçə və 1 məğlubiyyət əldə edib.

Azərbaycan isə Çexiya ilə 1:1-dən əvvəl Bolqarıstanla 0:0, Portuqaliya ilə 0:4, Cəbəllütariqlə 1:0 hesablı nəticələr əldə edib.

Britaniyalıların əsas üstünlükləri

Şotlandiyanın əsas fərqi futbolçularının daha yüksək səviyyəli futbol mühitində yetişməsi və bir qisminin İngiltərə Premyer Liqası klublarının akademiyalarında və ya peşəkar sistemində çıxış etməsidir.

Şotlandiya millisinin açıqladığı son heyətdə Tayler Fletçer - (“Mançester Yunayted”), Deniel Armer - (“Mançester Yunayted”), Coş Fini - (“Aston Villa”), Emilio Lourens - (“Luton Taun”), Dire Mebude - (“Çaykur Rizespor”), Kristi Montqomeri - (“Blekbern Rovers”), Deniel Kelli - (“Milluoll”), Eydan Borland - (“Aston Villa”), Bobbi Uels - (“Suonsi Siti”), Sem Çembers - (“Lids Yunayted”), Rori Vilson - (“Aston Villa”) kimi futbolçular yer alır.

Xüsusilə Tayler Fletçer diqqət çəkən addır. “Mançester Yunayted”in 19 yaşlı yarımmüdafiəçisi artıq Şotlandiyanın əsas millisində debüt edib və Dünya Kuboku heyətində də yer alıb.

Baş məşqçi Toni Dokeri onun yenidən U-21-də çıxış etməsini futbolçunun inkişafı baxımından vacib saydığını bildirib.

Bazar dəyəri

“Transfermarkt”in məlumatlarına əsasən, Şotlandiyanın geniş heyətinin ümumi bazar dəyəri təxminən 18,13 milyon avro göstərilir. Ən yüksək qiymətləndirilən futbolçular arasındadır.

Şotlandiyanın ən ciddi silahlarından biri fiziki intensivlik və sürətli keçidlər ola bilər. Komandanın heyətində geniş hücumçu seçimi var:

Ceyms Vilson, Dire Mebude, Emilio Lourens, Rori Vilson, Bobbi Uels və digər futbolçular fərqli hücum profilləri təqdim edirlər.

UEFA-nın heyət statistikasında Ceyms Vilsonun U-21 səviyyəsində 8 oyunda 4, Emilio Lourensin isə 6 oyunda 4 qol vurduğu görünür.

Bundan başqa, Şotlandiyanın müdafiə xəttində də İngiltərə futbol sistemində yetişən futbolçuların olması rəqibin fiziki mübarizə və hava toplarında üstünlük yaratmaq potensialını artırır.

Azərbaycan üçün əsas məsələ isə Çexiya oyunundakı intensivliyi və kompaktlığı qorumaq, müdafiə ilə yarımmüdafiə arasındakı məsafəni saxlamaq və top itkisindən sonra Şotlandiyanın sürətli keçidlərinə imkan verməməkdir.

SPORTİNFO.AZ