“Real”ın sabiq yarımmüdafiəçisi Uesli Sneyder UEFA Çempionlar Liqasının pley-off mərhələsində “Benfika” – “Real” (0:1) oyununda baş verən qalmaqala münasibət bildirib.
Qarşılaşmanın son dəqiqələrində “Benfika”nın müdafiəçisi Nikolas Otamendi Vinisius Juniora 2022-ci ildə Argentina millisi ilə qazandığı dünya çempionatına aid tatunu göstərərək, onu təxribata çəkməyə çalışıb.
Sportinfo.az xarici KİV-ə istinadən xəbər verir ki, Sneyder bu hərəkəti sərt tənqid edib:
“0:1 hesabı ilə uduzduğun oyunda bunu edirsən? Sənin başında problem var. Bu, çox uşaqcasınadır.
Mən Vinisiusun yerində olsaydım, deyərdim ki, “dostum, həmin dünya çempionatını sən yox, Lionel Messi qazandı. Bununla sənin bir əlaqən yoxdur”.
O, həmçinin, bildirib ki, Vinisius “Real”la dəfələrlə Çempionlar Liqasını və La Liqanı qazanıb, belə təxribatlar ona təsir etməz:
“Düzünü desəm, bunu səhv adama qarşı edirsən. Bəlkə, başqalarına təsir edərdi, amma Vinisiusa yox”.
Otamendinin göstərdiyi tatuda dünya çempionluğu və Lionel Messinin təsviri əks olunub.
