.jpg)
"Düzdür, uduzduq. Amma fəxr edirik ki, Şuşanı Azərbaycan tarixində ilk dəfə beynəlxalq arenada təmsil edən komanda olacaq".
Sportinfo.az xəbər verir ki, bunu "Xarı bülbül"ün təsisçisi, eyni zamanda kapitanı İlqar İmamquliyev "Murov"a 0:3 hesabı ilə uduzduqları Azərbaycan Yüksək Liqasının final oyunundan sonra deyib.
O, mövsümün ən pis matçını keçirdiklərini bildirib:
"Finala doğru zədə problemləri öz sözünü dedi. Əlimizdəki voleybolçular son matçdan 4 gün öncə oynaya bilmədilər.
Amma sevinirik. "Xarı bülbül" yeni yaranıb. Debüt ilindəcə "Neftçi" kimi 11 qat Azərbaycan çempionunu məğlub edib finala çıxmaq, avrokuboklara vəsiqə qazanmaq bizim üçün böyük uğurdur.
"Xarı bülbül" qəhrəmanlıq rəmzi, Şuşa bizim mədəniyyət beşiyimizdir. Komandamız gənc oyunçulardan qurulsa da, yaxşı iş gördüyümüzü düşünürəm.
Bizi dəstəkləyən hər kəsə minnətdarlığımı bildirirəm".
İmamquliyev avrokuboklarda işlərinin asan olmayacağını söyləyib:
"Amma hədəfimiz hər zaman yüksəkdir. Kubokda tendensiyalarımız var. Bu təcrübəni mütləq komandamıza gətirəcəyik.
Həm qadınlar, həm də kişilər arasında uğurlu olmağı hədəfləmişik. Məqsədimiz ən üst yerləri tutmaqdır.
Komanda mütləq güclənməlidir. Bu, son anda yığılan kollektivdir. Yeni mövsümdə daha fərqli, hamının fəxr edəcəyi komanda izləyəcəksiniz".
