"Sabah"ın yeni baş məşqçisinin kimliyinə qarşıdakı bu günlərdə aydınlıq gələcək. Sportinfo.az-ın məlumatına görə, Masazır təmsilçisi ukraynalı Yuri Vernidubla ortaq məxrəcə gələ bilməyib.
"Zarya"nı 2 dəfə Avropa Liqasının qrup mərhələsinə daşımış ukraynalı mütəxəssislə şərtlər üst-üstə düşməyib. Klub rəhbərliyi diqqətini yenidən Türkiyəyə yönəldib.
Amma bu dəfə maraq dairəsində olan Ümit Özat deyil. Sonuncu iş yeri "Adana Dəmirspor" olan Özatın çoxsaylı tələblər irəli sürməsi onunla razılaşmanı əngəlləyib.
Hazırda "Sabah"ın gündəmində adı hələlik gizli saxlanılan daha bir türkiyəli mütəxəssis var və o, danışıqlar üçün Bakıya dəvət edilib.