2019/2020 mövsümündə “Qarabağ”ın qapısını qoruyan, karyerası ərzində “Çelsi”, “Milan”, “Everton”, “Bornmut” kimi məşhur klubların formasını geyinmiş Asmir Beqoviç teleqraf-a müsahibə verib.

Sportinfo.az xəbər verir ki, hazırda klubsuz olan 39 yaşlı bosniyalı qapıçı sabiq komandası “Qarabağ”, Azərbaycan futbolu və gələcək planları barədə sualları cavablandırıb.

- Artıq bir müddətdir “Lester Siti”dən (İngiltərə) ayrılmısınız, karyeranızı harada davam etdirəcəyinizlə bağlı qərar vermisinizmi?

- Hazırda məşqlərimi davam etdirir və formamı qoruyuram. Doğru fürsət yaranacağı an hazır olmaq istəyirəm. Bir neçə klubla danışıqlar aparmışıq, amma hələlik heç nə yekunlaşmayıb. İllər ərzində öyrənmişəm ki, səbirli olmaq və həm peşəkar, həm də şəxsi baxımdan doğru layihəni seçmək çox vacibdir.

- Azərbaycan klublarından təklif almısınız? Ümumiyyətlə, ikinci dəfə qayıtmaq şansınız yaranarsa bunu dəyərləndirərdiniz?

- “Qarabağ”dakı dönəmim və ümumilikdə Azərbaycan haqqında hər zaman xoş xatirələrim olub. Təbii ki, insanlar bəzən geri qayıdıb-qayıtmayacağımı soruşurlar. Əgər uyğun fürsət yaranarsa və layihə mənim üçün cəlbedici olarsa, bunu mütləq nəzərdən keçirərəm. Azərbaycan futboluna böyük hörmətim var.

- “Çelsi”, “Bornmut”, “Milan”, “Everton” və “Qarabağ” kimi tanınmış klublarda çıxış etmisiniz. Lakin son illərdə karyeranızda müəyyən geriləmə müşahidə olunur və hazırda klubsuzsunuz. Sizcə, bunun səbəbi nədir?

– Futbol çox sürətlə dəyişir. Yaş artdıqca, xüsusilə də qapıçılar üçün imkanlar fərqli olur. Zədələr, doğru zamanda doğru komandada olmaq və digər amillər də burada mühüm rol oynayır. Verdiyim qərarlara görə ciddi peşmanlığım yoxdur. Çünki hər qərarı həmin dövrdə mənə ən doğru görünən seçim olduğu üçün vermişəm. Yaşadığım bütün təcrübələr həm futbolçu, həm də insan kimi inkişaf etməyimə kömək edib.

- Qarşıdakı planlarınız nələrdir? Artıq karyeranızı başa vurmaq barədə düşünürsünüz, yoxsa hələ də reallaşdırmaq istədiyiniz hədəflər var?

- Hələ də meydanda komandaya verə biləcəyim çox şeyin olduğuna inanıram. Doğru fürsət yaranacağı halda futbolçu karyeramı davam etdirmək istəyirəm. Əlbəttə, futboldan sonrakı həyat barədə də düşünməyə başlamışam. Bu, məşqçilik, media sahəsində fəaliyyət və ya gənc qapıçılara kömək etmək ola bilər. Amma hələlik karyeramı başa vurmağa tələsmirəm.

- Sabiq komandanız “Qarabağ”ın avrokuboklardakı çıxışını izləyirsinizmi? Klub ötən mövsüm UEFA Çempionlar Liqasının liqa mərhələsində çıxış etsə də, bu mövsüm Avropa Liqasından bir mərhələ keçdikdən sonra Konfrans Liqasına düşdü...

- Bəli, “Qarabağ”ın nəticələrini hər zaman izləyirəm. Klub uzun illər ərzində Avropada özünə güclü nüfuz qazandırıb. Hər mövsüm fərqli olur və Avropa futbolunda rəqabət getdikcə artır. Hər şey planlaşdırıldığı kimi getməsə də, “Qarabağ” Avropa səhnəsinin daimi iştirakçılarından biri olduğunu dəfələrlə sübut edib.

- “Qarabağ”ın Avropa Liqasının II təsnifat mərhələsində Bolqarıstan təmsilçisi ÇSKA ilə cavab oyununu izlədiniz? Komanda 120 dəqiqə ərzində qol vura bilmədi və penaltilər seriyasında mübarizəni dayandırdı. Sizcə, “Qarabağ” bu mövsüm də Avropada mühüm uğurlar qazana bilərmi?

- Oyunu izlədim. Nəticə məyusedici oldu, çünki oyunun taleyini çox kiçik detallar həll etdi. Penaltilər seriyası həmişə çətin olur və nəticə istənilən istiqamətdə dəyişə bilər. Yenə də inanıram ki, “Qarabağ” bu məğlubiyyətdən düzgün nəticə çıxarsa, Avropada yenidən uğurlu çıxış edəcək. Qurban Qurbanov bunun üçün kifayət qədər təcrübəyə malik məşqçidir.

- Həmin görüşdə qapıçı Mateuş Koxalskinin penaltilər seriyasındakı performansı ciddi müzakirələrə səbəb oldu. Çoxları hesab edir ki, o, ən azı bir və ya iki penaltini dəf etməli idi. Peşəkar qapıçı kimi onun çıxışını necə qiymətləndirirsiniz?

- İnsanlar çox vaxt qapıçıları yalnız yekun nəticəyə görə qiymətləndirirlər. Halbuki penaltiləri dəf etmək son dərəcə çətindir. Qapıçı yaxşı hazırlaşa, düzgün istiqaməti seçə bilər, amma zərbə ideal yerə vurularsa, yenə də topu çıxarmaq mümkün olmur. Mən komandanın mübarizəni dayandırmasına görə onu günahlandırmazdım. Futbol komanda oyunudur və görüş penaltilərə qədər 120 dəqiqə davam etmişdi.

- “Sabah” da bu mövsüm Çempionlar Liqasına uğurlu start verib. Sizcə, son Azərbaycan çempionu “Qarabağ”ın Avropadakı uğurlarını təkrarlaya bilərlərmi?

–- Avropada daha çox Azərbaycan klubunun rəqabətədavamlı olması sevindiricidir. “Qarabağ” uzun illər ərzində çox yüksək standart formalaşdırıb və həmin uğuru təkrarlamaq asan olmayacaq. Amma "Qarabağ" - "Sabah" rəqabətı futbolun inkişafı baxımından faydalıdır. Əgər “Sabah” inkişafını davam etdirsə, bu rəqabət həm hər iki kluba, həm də ümumilikdə Azərbaycan futboluna müsbət təsir göstərə bilər.

- Təcrübəli qapıçı kimi bir məsələyə də münasibətinizi bilmək istərdik. “Neftçi”nin qapıçısı Kenan Piriçin keçmiş agenti Teleqraf-a müsahibəsində Emil Balayev və Rza Cəfərovu tənqid edərək onların “Neftçi”ni zəiflətdiyini, ümumilikdə isə azərbaycanlı qapıçıların səviyyəsinin çox aşağı olduğunu bildirib. Bu fikirlərə münasibətiniz necədir?

- Hər kəsin öz fikrini bildirmək hüququ var. Amma mən futbolçular barədə qüsurlu müqayisələri xoşlamıram. Hər qapıçının öz güclü və zəif tərəfləri var. Üstəlik, özünəinam bu mövqedə çox vacib amildir. Konstruktiv tənqid normaldır, amma futbolda hər zaman hörmət qorunmalıdır. Düşünmürəm ki, bütün qapıçılar haqqında belə ümumi və mənfi fikir söyləmək ədalətlidir.

- Agent iddia edib ki, Azərbaycan qapıçılarının səviyyəsi aşağıdır. "Qarabağ"da çıxış etdiyiniz vaxt bəyəndiyiniz yerli qapıçılar vardı?

- Mən bu qədər ümumi fikirlə razı deyiləm. Hər ölkə futbolçuların müxtəlif nəsillərindən keçir. Azərbaycanda çıxış etdiyim dövrdə yaxşı potensiala malik istedadlı qapıçılar görmüşəm. Ad olaraq demək çətin olar. Əsas məsələ qapıçı hazırlığına, uşaq-gənclər futbolunun inkişafına sərmayə qoymaq və gənc qapıçılara təcrübə qazanmaq üçün imkan yaratmaqdır. Məhz bu yolla səviyyə zaman keçdikcə yüksəlir.

- Yaxın vaxtlarda Azərbaycana gəlmək planınız varmı? Hansısa oyunu stadiondan izləməyi düşünürsünüz?

- Təəssüf ki, səyahət etmək və ya oyunları stadiondan canlı izləmək imkanım yoxdur. Amma belə bir imkanım olsaydı, Bakıya gəlib futbol izləməyi çox istərdim. Xüsusilə “Qarabağ”ın və ya Azərbaycan milli komandasının vacib oyunlarından birini stadiondan izləmək maraqlı olardı.