«Qarabağ» Qətərdən yeni dəvət alıb.
Bu barədə Sportinfo.az-a Ağdam klubunun futbol akademiyasının baş koordinatoru Aftandil Hacıyev məlumat verib.
Funksioner ərəb ölkəsindən gələn təklif üzərinə səfərə çıxacaqlarını bildirib. O, mayda Qətərdə keçiriləcək beynəlxalq turnirdə iştirak edəcəklərini söyləyib:
«Hazırda danışıqlar gedir. Bu işlərlə akademiyamızın meneceri Nail Kərimov məşğuldur.
Ola bilsin, Qətərə bir yox, bir neçə komandamız getsin. İstəyirik ki, bundan sonra belə turnirlərdə tez-tez iştirak edək.
Beynəlxalq təcrübə bizim uşaq və yeniyetmələr üçün çox vacibdir.
Bilirsiz ki, aşağı yaş qruplarımız son 1 ildə Türkiyə və Belarusda keçirilən turnirlərdə qüvvəsini sınayıb. Getdikcə bu sayı daha da artırmaq niyyətindəyik.
Son vaxtlar belə təkliflərin sayı da artıb. Çünki artıq hər yerdə «Qarabağ»ı tanıyırlar».