AFFA Premyer Liqada mübarizə aparan klubların akademiyaları ilə bağlı hesabat dərc edib.

Federasiyanın Lisenziyalaşdırma və Qeydiyyat Departamenti tərəfindən aparılan monitorinqlər əsasında hazırlanan hesabatda klubların akademiyaları müxtəlif meyarlar üzrə 5 ballıq şkala ilə qiymətləndirilib.

Monitorinqin nəticəsinə əsasən, Azərbaycan klubları arasında ən yaxşı akademiya “Sabah”a məxsusdur.

Ölkədə son illərdə aşağı yaş qrupları üzrə işlərlə diqqət mərkəzinə düşən “bayquşlar”ın akademiyası 5 ballıq şkala ilə 4 ulduza layiq görülüb.

“Sabah” nəzərdə tutulan 4 meyarın – infrastruktur, məşq keyfiyyəti, məşqçi rifahı və idarəetmə meyarlarının 3-də bütün klubları üstələyib. “

Qara-çəhrayı” klubun akademiyası istər məşq keyfiyyəti, istər məşqçi rifahı, istərsə də idarəetmə meyarlarında ən yaxşı hesab edilib. “Sabah” yalnız infrastrukturla bağlı meyarda “Qəbələ”dən geri qalıb.

“Sabah” 4 ulduza layiq görülən yeganə futbol akademiyası olub.

Sonrakı yerləri isə müvafiq olaraq “Turan Tovuz” (3,5 ulduz), “Sumqayıt” (3,5), “Neftçi”, “Qarabağ”, “Qəbələ” (hər üçü 3 ulduz), “Zirə” (2,5 ulduz), “Şamaxı”, “Kəpəz” (hər ikisi 1,5 ulduz) qərarlaşıblar.

“Karvan-Yevlax”, “Araz-Naxçıvan” və “İmişli”nin futbol akademiyaları isə sadəcə, 1 ulduzla qiymətləndiriliblər.

Hesabatda, həmçinin hər futbol akademiyası ilə bağlı aparılmış monitorinqin nəticələri ətraflı qeyd edilib, akademiyaların üstün və mənfi cəhətləri vurğulanıb.

SPORTİNFO.AZ