Samir Abasovu yola salmış «Neftçi»nin ayrılıqla bağlı növbəti cəbəri, yəqin ki, Emin Mahmudova aid olacaq.
Onun 2017-ci ildən bəri formasını geyindiyi bu klubda özünü rahat hiss etmədiyi görünür.
Eləcə də ondan razı deyillər.
Sənan Qurbanov Tovuz səfərində kapitanı əsas heyətə daxil eləmədi.
«Turan» qarşısında cəmi 19 dəqiqə forma geyindi, onda da iti ötürməsiylə, qol pasıyla, başqa nəyləsə yadda qalmadı. Ayağına gələn topu sağa və sola çevirdi, vəssalam!
«Neftçi»də bir neçə futbolçu var, onlar da Emin kimi sabit deyil, komandaya faydası az dəyir. Sessi Dalmeyda, İqor Ribeyro, Kristian Kostin və digərlərinin adlarını çəkmək olar.
«Neftçi» Tovuza xal arxasınca getmişdi. Vensan Abubakar rayona ilk səfərində ara-sıra nəzərə çarpdı, iki təhlükəli zərbə ilə kameraları özünə tərəf tuşladı.
Bir də İmad Faraj.
Sonuncunun «Neftçi»nin Zubiri olacağını iddia edənlər, yəqin ki, indi utandığından başını yuxarı qaldırmaz.
Həmyerlisi «Qarabağ»ın kapitanının ayaqqabısını geyinə bilər, amma yerişini yeriyə bilməz. İlk hissədə qaçırdığı epizod Farajın Zubirin yarısı belə, olmadığını göstərdi.
Baş məşqçi dəyişəndə, adətən, futbolçuların qanı qaynayır, ruhu təzələnir. «Neftçi»nin oyunçularında bunu sezmədik amma.
Sanki komandanın canında bir qorxu hissi var, özgüvənləri yerli-dibli itib.
KAMİL
