"Neftçi"nin bu mövsüm də Premyer Liqada işləri yolunda getmir.
"Ağ qaralar" arxada qalan 13 turda aktivinə cəmi 16 xal yazdıra bilib.
Komanda ilk altılıqdan belə kənardadır.
Çempionluq hədəfi reallıqdan çox uzaqdır.
Kollektiv ən yaxşı halda ilk üçlükdə yer ala bilər.
Amma bir də Ölkə Kubokunda mübarizə var.
Komandanın burada rəqibi "Zirə"dir.
1/8 finala təsadüf edən tərəflərin görüşü Zirədə baş tutacaq və cütün qalibi 1 oyunla müəyyənləşəcək.
Titul qazanmaq yolunda son şans da demək olar.
Komanda bunu bacara biləcəkmi?
Sportinfo.az-a açıqlamasında mərkəz müdafiəçisi Elvin Bədəlov başqa şansları olmadığını bildirib:
"Əlbəttə, titul yolunda son şansımızdr. Çempionatda bunu bacarmağımız artıq çətin görsənir. Ortada reallıq var.
Kubok real şansdır. Çalışacağıq kuboku qazanaq. Heyətimiz buna imkan verir.
Bugünkü vəziyyəti qiymətləndirəsi olsaq, çempionatı ilk üçlükdə bitirib, ölkə kubokunu qazana bilsək mövsümü müsbət qiymətləndirmək olar".
XANOĞLAN
