"Neftçi"nin uğursuz çıxışı davam edir.
"Ağ qaralar" bu dəfə Tovuz səfərində xal itirdi.
"Turan Tovuz"la matç qolsuz bərabərliklə başa çatdı. Bununla da 13 turdan sonra aktivində 16 xalı olan paytaxt klubu turnir cədvəlində 7-ci pillədə yer alır.
Komandanın müdafiəçisi Elvin Bədəlov yaranmış vəziyyətlə bağlı Sportinfo.az-a açıqlama verib.
30 yaşlı oyunçu "Şəraiti ən yaxşı olan iki klubundan biri olan "Neftçi" niyə ilk "altılıqd"a belə, yer almır" sualına cavabında bunları qeyd edib:
"Səbəbini nədə axtara bilərik? Baş məşqçi getdi, amma hər şeyi onun üstünə atmaq olmaz.
Biz futbolçularda günah çoxdur. Bu yerdə olmağımızda özümüzün günahkar olduğunu fikirləşirəm.
Düzdü, 2-3 oyunda hakim qərarları doğru deyildi. Amma özümüz də hardasa düz qərarlar vermədik.
Özümüzdən başlamalıyıq. Hər şeyi baş məşqçinin üzərinə atmaq düzgün deyil.
Şəxsən mən məsuliyyəti öz üzərimə götürürəm. Uşaqlarda da belədir. Vəziyyətdən çıxmağa çalışacağıq.
Başqa yolumuz yoxdur. Məşqçi kim olur-olsun kollektiv olaraq birləşib, düşdüyümüz yerdən çıxmalıyıq".
XANOĞLAN
