Milli komandamız və "Sabah"ın yarımmüdafiəçisi Təmkin Xəlilzadə "İnstagram"da izləyicilərinin suallarını cavablandırıb. Sportinfo.az həmin müsahibəni təqdim edir.

- Azərbaycanın ən böyük fan-klubu hansıdır?

- Azarkeşlər bizim üçün dəyərdir. Amma ən böyük fan-klub "Forza Neftçi"dir.

- "Qəbələ" əvvəlki potensialını bərpa etsə, ora qayıdarsız?

- Futbolda hər şey mümkündür.

- Deyəsən, "İmarət Tayfa"nı unutmusuz. Ona görə "Forza Neftçi" dediz...

- Bütün fan-klublar bizimdir. Eyni sözlər "Sabah" və "Səbail" klublarına da aiddir. Yaxud da "Milli dəstə". Bütün azarkeşlər mənə doğmadır.

- Sən, sadəcə, vəhşisən... (Futzal üzrə yığmamızın qapıçısı Rövşən Hüseynlinin sualı).

- Sən daha vəhşisən, Rövşən.

- Sol ayaqlarımızı dəyişək?

- Problem yoxdur. Oyun günü yazın, kuryerlə göndərim.

- Sizi nə vaxt xarici çempionatda görə bilərik? Potensial da, yaş da buna imkan verir...

- Məncə də artıq vaxtdır. Real təklif olsa, mütləq dəyərləndirəcəm.

- Ölkə xaricinə getməyin. Azərbaycanlı futbolçuların əksəriyyəti orada heç nəyə nail ola bilmir...

- Mən özümə inanıram.

- Messi, yoxsa Ronaldo?

- Messi.

- Mövsüm ərzində neçə qol vura bilərsiz?

- Mən müdafiəçiyəm. İşim müdafiə olunmaqdır, qol vurmaq yox.

- Oyun vaxtı niyə əsəbi olursuz?

- Uduzmağı sevmirəm. Heç nə yolunda getməyəndə istər-istəməz aqressiya olur. Bu isə qələbə istəyimdən irəli gəlir.

- Meydandan kənarda isə çox sakitsiz...

- Bəli, Bəhlul Mustafazadə, sən ki məni özümdən də yaxşı tanıyırsan.

- Mənim "dəli" böyük qardaşım!

- Sezar Meza Kolli, "Sabah"a keç!

- Millinin stadionda baxdığım ilk oyununda yeganə qolu siz vurduz...

- Ayağınız yüngül olub.

- Çox şirinsiz. Bunu necə bacarısız?

- Hər səhər iki qaşıq bal yeyirəm.

- Sevimli filminiz hansıdır?

- Sonuncu dəfə türklərin "7-ci kameradakı möcüzə" filminə baxmışam. Hamıya məsləhət görürəm.

- "Neftçi"dən təklif gəlsə, qəbul edərsiz?

- Belə bir şey olsa, düşünmək lazımdır.

- "Neftçi" haqda nə deyə bilərsiz?

- Həyat yoldaşım "Neftçi" azarkeşidir.

- "Qarabağ"da oynamağınızı istərdik...

- "Qarabağ"da oynamışam. Məhz orada debüt etmişəm.

- Karyeranızı bitirdikdən sonra məşqçi işləmək istərdiz?

- Bəli, istərdim.