Azərbaycan – Lixtenşteyn matçının ən yaxşılarından biri Abdullax Xaybulayev olsa da,
Yarımmüdafiəçi 100 faizlik qol şansını qaçırmaqla 0:0-ın əsas günahkarlarından birinə çevrildi.
25 yaşlı futbolçu oyundan sonra utandığından başını qaldıra bilmirdi.
Buna baxmayaraq, çətinliklə də olsa, Sportinfo.az-ın suallarını cavablandırdı.
- Bu nəticədən sonra nə deyə bilərsən?
- Deməyə sözüm yoxdur. Bu komandanı udmalıydıq.
- Nə çatmadı?
-1 qol vurmalıydıq ki, rəqib müdafiədən çıxsın. Bundan sonra qolların davamı gələcəkdi. Bacarmadıq. Onlar 90 dəqiqə müdafiə olundular, biz isə müdafiəni yara bilmədik.
- Millidə nə problem var?
- Bu oyunda bitiricilik və keyfiyyət.
- Bəs, ümumi planda?
- Keyfiyyət.
- Keyfiyyət zamanla, oyundan-oyuna düzələn şeydir?
- Əlbəttə.
- 23-25 yaşa qədər keyfiyyət lazımi səviyyədə olmayıbsa, bundan sonra olacaq?
- Futbol zəhməti sevir. Daha çox çalışmaqla buna nail olmaq mümkündür.
- Özün də 100 faizlik şansı boşa verdin. Oyundan sonra baş məşqçi həmin epizodla bağlı nə dedi?
- Hələ heç nə deməyib.
- Öz-özünə nə dedin?
- Həm Litva, həm də bugünkü oyunda əlverişli imkanlardan yararlana bilmədim. Halbuki şansları dəyərləndirsəydim, qalib gələ bilərdik. Bayaq dediyimə qayıdıram, bitiriciliyi və futbolçu keyfiyyətimi artırmalıyam.
HƏBUB
