“Qəbələ” ilə “İmişli” arasında baş tutan oyundan sonra qəbələli yeniyetmələr Azər Salahlını gözləyirdi.
Onlardan biri vaxtilə “Neftçi”nin və Azərbaycan millisinin şərəfini qorumuş futbolçu üçün portret hazırlamışdı ki, məqsədi çərçivəyə saldığı şəkli Salahlıya verib, əvəzində kapitanın formasına sahiblənmək idi.
Komandasının qələbə qazanması (1:0) Azərin əhvalına yaxşı mənada təsir etmişdi.
Odur ki, yeniyetmələrin əhatəsinə düşüb imza atmaqdan və şəkil çəkdirməkdən boyun qaçırmadı.
Uşağın ona uzatdığı portreti görəndə isə Salahlı çıxılmaz vəziyyətə düşdü. Çünki hədiyyənin qarşılığında azyaşlıya forma vermək gərəkirdi. Salahlı isə tərli idman geyimini yuyulmaq üçün klubun işçilərinə vermişdi.
Kapitan hədiyyəyə necə qarşılıq vermək üçün çox düşünmədi. Əlindəki bir qutu pizzanı azyaşlıya uzadıb “bu dəfə bunu qəbul et, gələn dəfə mütləq forma həddiyyə edəcəyəm” şəklində dilləndi.
Uşaq istəyinə çatmaq üçün çox çalışdı, xahiş-minnət etdi, di gəl, qazandığı bir qutu pizza oldu.
HƏBİB / SPORTİNFO.AZ
