Çempionlar Liqasında 1/8 final mərhələsinin daha 2 oyunu keçirilib.
Sportinfo.az xəbər verir ki, hər iki qarşılaşma qonaqların qələbəsi ilə başa çatıb.
İspaniya La Liqasının lideri "Atletiko" pandemiya səbəbindən Rumıniyanın paytaxtı Buxarestdə oynanılan görüşdə İngiltərənin "Çelsi" komandasına 0:1 hesabı ilə uduzub. Yeganə qolu 82-ci dəqiqədə Olivye Jiru vurub.
İtaliya "Latsio"su isə öz meydanında turnirin son qalibi Almaniya "Bavariya"sına 1:4 hesabı ilə məğlub olub. Oyunda hesabı 9-cu dəqiqədə qonaqların hücumçusu Robert Levandovski açıb.
23-cü dəqiqədə Camal Musiala, 42-ci dəqiqədə isə Leroy Sane rəqibi növbəti dəfə meydanın mərkəzinə dəvət edib. İlk hissə bu hesabla bitib. Münhen təmsilçisi ikinci yarıya da erkən qolla başlayıb.
47-ci dəqiqədə Roma klubunun futbolçusu Françesko Açerbi topu öz qapısından keçirib. 2 dəqiqə sonra "Latsio" fərqi azaltsa da, bundan artığına gücü çatmayıb.
Komandalar arasında cavab görüşləri martın 18-də keçiriləcək.
1/8 final mərhələsi, ilk oyunlar
"Atletiko" (İspaniya) - "Çelsi" (İngiltərə) - 0:1
Qol: Olivye Jiru, 68
"Latsio" (İtaliya) - "Bavariya" (Almaniya) - 1:4
Qollar: Xoakin Korrea, 49 - Robert Levandovski, 9, Camal Musiala, 23, Leroy Sane, 42, Françesko Açerbi, 47 (avtoqol)
1/8 finalın əvvəlki görüşlərində PSJ "Barselona"ya 4:1, "Liverpul" "Leyptsiq"ə 2:0, "Portu" "Yuventus"a 2:1, "Borussiya" (Dortmund) isə "Sevilya"ya 3:2 hesabı ilə qalib gəlib. Mərhələnin digər iki oyunu bu gün keçiriləcək.
"Real Madrid" İtaliyada "Atalanta" ilə, "Mançester Siti" isə Macarıstanın paytaxtı Budapeştdə "Borussiya" (Mönhenqladbax) ilə münasibətlərinə aydınlıq gətirəcək.