Gürcüstanın Batumi şəhərində keçirilən 43-cü Ümumdünya Şahmat Olimpiadasında millilərimizin tutduğu yerlər müəyyənləşib.

Sportinfo.az xəbər verir ki, kişi millimiz 15 xalla XV yeri tutub.

Çin millisi çempion olub. ABŞ gümüş, Rusiya şahmatçıları isə bürünc medallara yiyələnib. Hər üç komandanın 18 xalı olsa da, əlavə göstəricilərə görə Asiya təmsilçisi qızıl medallara sahib çıxıb.

V turda yığmamıza uduzmuş Ermənistan millisi isə 16 xalla VIII yerdə yarışı bitirib. Vyetnamla heç-heçə edən qadın millimiz isə son turda VII yerdən aşağı düşüb. 16 xalı olan komandamız yekunda yarışı X pillədə başa vurub.

Burda da qızıl medallar Çin millisinə qismət olub (18 xal). Daha bir 18 xalı olan Ukrayna gümüş medallara yiyələnib. Bürünc medallar isə 17 xalı olan meydan sahibi Gürcüstana qismət olub.

XI turda medal şansını itirmiş kişi millimiz Serbiya ilə qarşılaşıb. Ardıcıl dörd görüşdə qələbə üzünə həsrət qalan millimiz turnirdə qapını bərk çırpıb. Belə ki, Şəhriyar Məmmədyarovun oynamadığı turda millimiz 4:0 qalib gəlib.

Teymur Rəcəbov Duşan Popoviçdən, Arkadi Naydiç Miloş Roqanoviçdən, Rauf Məmmədov Marko Neneziçdən, Eltac Səfərli Velimir İviçdən üstün olub. Bununla da millimiz turniri 15 xalla başa vurub.

Medal şansı qalan qadın millimiz isə Vyetnamla 2:2 edib. Günay Məmmədzadə Ti Kim Punq Voya qalib gəlib. Zeynəb Məmmədyarova Le Tao Nquyen Famla, Gülnar Məmmədova Ti Bao Tram Hoanqla heç-heçə edib. Ülviyyə Fətəliyeva isə Ti Mai Hunq Nquyenə uduzub.

Bununla da qadın millimiz turniri 16 xalla başa vurub. Komandamızın neçənci sıranı tutduğu bütün görüşlər başa çatdıqdan sonra bilinəcək.

Kişilər

Serbiya - Azərbaycan - 0:4

Duşan Popoviç - Teymur Rəcəbov - 0:1

Miloş Roqanoviç - Arkadi Naydiç - 0:1

Marko Neneziç - Rauf Məmmədov - 0:1

Velimir İviç - Eltac Səfərli - 0:1

Qadınlar

Vyetnam - Azərbaycan - 2:2

Vo Thi Kim Funq - Günay Məmmədzadə - 0:1

Fam Le Thao Nquen - Zeynəb Məmmədyarova - 0,5:0,5

Thi Bao Tram Hoanq - Gülnar Məmmədova - 0,5:0,5

Thi Mai Hunq Nquyen - Ülviyyə Fətəliyeva - 1:0