Çempionlar Liqasının əsas mərhələsinin beşinci turu çərçivəsində keçiriləcək “Sabah” - “Barselona” (İspaniya) oyununa satılan biletlərin sayı açıqlanıb.
Sportinfo.az xəbər verir ki, paket satışlar da daxil olmaqla, qarşılaşma üçün indiyədək 50 min bilet satılıb.
Çempionlar Liqasının əsas mərhələsində dörd turdan sonra “Barselona” doqquz xalla turnir cədvəlinin beşinci, “Sabah” isə üç xalla 31-ci pilləsində qərarlaşıb.
Noyabrın 25-də Bakı Olimpiya Stadionunda keçiriləcək “Sabah” - “Barselona” matçı saat 21:45-də start götürəcək.
