Vüqar Həşimovun xatirəsinə həsr olunan "ShamkirChess 2018" superturnirində IV tur sona yaxınlaşır.
IV turda Azərbaycan şahmatçısı Şəhriyar Məmmədyarov Bolqarıstan təmsilçisi Veselin Topalova uduzub.
Sportinfo.az xəbər verir ki, Şəhriyar Məmmədyarov məğlubiyyətə səbəb kimi risk etməsini göstərib:
"Oyunda vəziyyət iki dəfə dəyişdi. Əvvəlcə üstünlük əldə etdim. Amma onu inkişaf etdirmək mümkün olmadı. Sonradan Topalov həlledici gedişlərlə vəziyyəti xeyrinə dəyişdi. İki dəfə heç-heçə etməyə imkanım var idi.
Yəni istəsəydim oyunu bərabərliklə başa çatdırardım. Sadəcə bu nəticəni istəmədim. Qələbə qazanmağı arzulayırdım. Düşündüm ki, nəhayət bu gün qələbə qazanmaq vaxtıdır. Heç-heçə etmədiyim üçün peşman deyiləm
. Risk etdim və sonda uduzdum. Risk etmək həmişə uğurlu sonluqla yekunlaşmır. Bəzən uduzursan. Heç-heçə etməyərək mübarizəni davam etdirdiyim üçün özümü qınamıram.
Məğlubiyyət məni daha da güclü edəcək. Motivasiya artacaq. İndi başa düşürəm ki, növbəti turlarda qələbə qazanmağa borcluyam".
