Azərbaycan Şahmat Federasiyasının hesabat konfransı keçirilib.

Sportinfo.az xəbər verir ki, konfransa Azərbaycan Şahmat Federasiyasının prezidenti Mahir Məmmədov rəhbərlik edib.

AŞF rəhbəri 2022-ci ilin yekunları barədə məruzə ilə çıxış edib, ötən ilin nəticələrini xatırladıb. Ardınca ötən ilin yekunlarına həsr olunan qısa film nümayiş etdirilib.

İclasda Azərbaycan Şahmat Federasiyasının üzvlüyünə yeni şəxslər qəbul ediliblər. Üzvlük kriteriyalarına əlavələr edilib. 2022-ci ilin və cari təqvim ilinin büdcəsi barədə konfrans iştirakçılarına məlumat verilib.

Konfransda Azərbaycan Şahmat Federasiyasının nizamnaməsinin bəzi bəndlərinə dəyişikliklər, İcraiyyə Komitəsinin üzvlərinin sayının artırılması və yeni üzvlərin seçilməsi məsələlərinə baxılıb.

Ailə, Qadın, və Uşaq Problemləri üzrə Dövlət Komitəsinin sədr müavini, beynəlxalq qrosmeyster Aynur Sofiyeva, Elm və Təhsil Nazirliyinin Məktəbdənkənar fəaliyyətin təşkili şöbəsinin müdiri Elnur Əliyev səsvermə ilə İcraiyyə Komitəsinin yeni üzvləri kimi təsdiqləniblər.

Azərbaycan Şahmat Federasiyasının İntizam Komissiyası formalaşdırılıb. İlqar Xələfovla Ələmdar Məmmədov komissiyaya üzv, Elçin Məmmədov sədr seçilib.

Azərbaycan Şahmat Federasiyasının Hakimlər, Məşqçilər, Uşaq və Gənclər, Bəstəçilik, Qadın və Sosial məsələlər, Regional İnkişaf Komissiyalarının hesabatları dinlənilib.

Ümummilli lider Heydər Əliyevin 100 illiyinə həsr olunan silsilə tədbirlər barədə məlumat verilib.

Hesabat konfransından sonra Azərbaycan Şahmat Federasiyasının İcraiyyə Komitəsinin iclası keçirilib.